DIHAY higayon nga namaligya og para pa-gwapa akong amiga unya iyang kanunay balikbalikon paglitok “kining akong baligya nga lipstick puwa pa sa makupa unya dugay mapapas garantisadong makapaguwapa.”
Akong gikomedyahan og tubag nga di ko mopalit ana kay daan naman kong gwapa, dayong pangatawa sa nakadungog.
Karong adlawa atong hisgutan ang mga tips kung unsaon para mosamot kaanyag nga way gasto.
Ayaw pagpainit og diretso sa adlaw kay kining iyang UV light makapakunot sa panit. Mao sab ni rason nganong kadtong dunay trabaho nga diriktang maigo sa adlaw (alas 10-4 sa hapon) mas tiguwang ang dagway tan-awon.
Mao sab kini makaingon sa cancer sa panit og talumtom.
Busa kung mogawas sa tumang kainit, pagpayong o pagkalo aron maprotektahan ang nawong ug lawas. Kung di malikayan ang paggawas aning orasa, tambag sa mga dermatologist, maggamit og sunblock nga may nakasuwat nga SPF 15-30.
Undangi na sab ang pag-inom og ilimnong makahubog ug pagpanigarilyo kay gawas nga makabaho kini sa baba ug makalagom sa ngabil, makapakunot pa gayod kini sa panit maong mas matiguwang tan-awon ang nawong.
Angay maligo kada adlaw gamit ang sabon ug daghang tubig aron presko ug limpyo ang paminaw una matulog.
Inom og daghang tubig mga 8-10 ka baso kada adlaw kay dako kini og matabang nga di mag-uga ang pamanit.
Palayo sa stress. Ang dali ug sige og kasuko makapangil-ad sa hitsura itandi sa hingatawa nga hayag og dasig ang dagway.
Pahuway og katulog sa insaktong oras (7-8 kada adlaw) aron di modagko ang eyebags. Mag relax una matulog sama sa pagpaminaw og nindot nga sonata.
Paggamit og moisturizer sa nawong og lotion sa lawas kay makatabang kini og pahamis. Ayaw kalimot pagtangtang sa makeup una matulog aron presko ang pamati unya di bugason.
Katapusan, mag-ehersisyo unya kaon og daghang prutas ug utanon kay daghan kini og sustansiya, bitamina ug mineral. Palayo sa pagkaong mantikaon, tambok, parat, subra ka tam-is og mga sitsirya.