Bisan sa iyang unanimous nga kapildehan batok ni Yordenis Ugas niadtong Agusto 22, taas gihapon ang ranking ni Senator Manny Pacquiao nga gipatik sa Ring Magazine karong tuiga.
Si Pacquiao, ang nag-inusara nga boksidor sa tibuok kalibotan nga nahimong world champion sa walo ka division diin katulo isip WBO welterweight, usa sa WBA welterweight, nahimutang sa ika-5 sa listahan.
Si WBC ug IBF unified titlist nga si Errol Spence kinsa mao unta ang kontra ni Pacquiao niadtong Agusto kon wala pa ma-danyos ang iyang mata, maoy nag-una sa listahan, sunod si WBO champion Terrence Crawford , ikatulo si Ugas ug ika-upat si Shawn Porter.
Ang Ring Magazine welterweight title nagpabilin nga bakante human niretiro si Floyd Mayweather niadtong 2015 diin ang rule nag-ingon nga ang number one makigsumbagay sa number two o number three aron adunay mahulip apan wala kini mahitabo sanglit si Spence wala makaaway ni Pacquiao nga maoy number 3 niadtong panahona.
Si Crawford ug Porter gikataho nga magsumbagay karong Nobyembre diin ang modaog maoy mobangga kang Spence para sa Ring Magazine welterweight title kon dili mag-una og away si Spence ug si Ugas.
Sa pound for pound boxers nga laing listahan sa Ring Magazine, si Crawford ang kanunay nga number one ug number three si Canelo Alvarez ug number six si Spence.
Samtang siyam ka laing Filipino boxers ang nasulod sa Ring divisional rankings diin si WBC titlist Nonito Donaire ang number one ug number two si WBO champion Johnriel Casimero sa Bantamweight sa Ring Magazine ug number 3 si Naoya Inoue sa Japan.
Walay Pinoy nga naapil sa light flyweight ug flyweight divisions.
Ang long reigning IBF champion nga si Jerwin Ancajas ug former multi division world champion Donnie Nietes nahimutang sa ika-5 ug ika-7 sa super flyweight diin ang WBC ug WBA unified title holder Juan Francisco Estrada sa Mexico maoy Ring Magazine lineal world champion.
Si Mark Magsayo, ang WBC mandatory challenger ug bag-ong internatioanl featherweight champio maoy nag-inusarang Ring rated Pinoy fighter ug nahimutang sa ika-5 sa featherweight nga gipangulohan sa WBO champion nga si Emanuel Navarette sa Mexico. (PAC)