Binasi sa Kinaadman 2:12, 17-20; Salmo 54; Santiago 3:16-4:3; Marcos 9:30-37
Mas makalingaw kuno ang mahimong apohan kaysa mahimong ginikanan. Sagad ang madungog mao nga sayon ang papel sa lola ug lolo kay inigkahuman nilag pamarayeg sa ilang apo, ibalik lang nila kini sa ginikanan. Angay na sad oy kay nakaagi na pod sila nianang yugtoa sa ilang kinabuhi kanus-a sila gyod ang responsable.
Morag mas kusog sad moparayeg ang mga apohan. Ang akong anhing nga lola kusog tong mamaak sa aping sa mga apo. Akong lolo kusog mokusikusi sa mga bukton. Daghan sa mga apohan kusog mohagwahagwa. Ang paghagwa kalipay sa usa ka hamtong nga gipaambit ngadto sa usa ka bata o masuso. Kusog kini nga kontrolado kay kon magpasagad basig masakitan ang bata.
Naglalis ang mga tinun-an ni Jesus kon kinsa kanila ang labing dako. May gisulti dayon si Jesus ug may gihimo siya. “Kon adunay buot nga mahiuna, magpakahimong ulahi sa tanan ug alagad sa tanan,” miingon siya. Gipatindog dayon niya ang usa ka bata ug gikugos kini. “Ang bisan kinsa nga modawat sa usa ka bata nga sama niini sa akong ngalan, modawat kanako,” miingon siya.
Unsa may mensahe ni Jesus? Pinaagi sa iyang pagdawat sa bata gipakita niya kanila nga ang tinuoray nga gamhanan mao kadtong maantigong moabi-abi sa mga wala gahom sa katilingban, kay ang mga bata sa panahon ni Jesus walay may mga katungod. Malumo ug mapailubon ang tawo nga mohimo niini.
Sa libro sa Kinaadman nagalaraw ang mga kontra sa mga matarong nga tawo kon unsaon nila pagpalisodlisod kaniya. “Kon ang mga matarong tinuod gayod nga mga anak sa Dios, ang Dios magluwas kanila sa ilang mga kaaway. Busa sulayan ta sila. Ato silang daogdaogon ug sakiton; unya sutaon ta unsa kamalinawon ug kamataronganon sila? Sutaon ta asa kutob ang ilang pag-agwanta!”
Sa ato pa, kon palisodlisoran ang usa ka tawo moggawas ang iyang tinuoray nga kolor. Apan may nakasulti pod nga “kon buot gyod nato nga mogawas ang tinuoray nga kolor sa usa ka tawo, hatagi siya og gahom.” Kon walay pagpaubos ug pailob man god ang usa ka tawo, mahimo siyang maguba tungod sa gahom. Mao bitaw nga may moingon kita nga ang usa ka tawo “others” na kay morag nabag-o siya. Sagad ang gahom ug pagkaadunahan maoy makapahimo natog “others”.
May dugang punto ang sulat ni Santiago. Miingon siya, “Apan ang kaalam nga gikan sa langit, una sa tanan putli, ug unya makigdaiton, maaghop, mahigalaon, maluluy-on ug maayong binuhatan; dili usab kini mopihig ug dili tigpakaaron-ingon.”
Ang mosukwahi niining maong mga hiyas nagagikan sa kahiladman sa tawo: “Unsa bay hinungdan sa inyong panag-away ug panagbingkil? Dili ba ang inyong mga lawasnong kaibog nga nagkasumpaki sa sulod ninyo?” Ang tawo nga mapaubsanon ug adunay pagpugong makabuntog sa lawasnong kaibog nga maoy hinungdan sa mga panagbingkil.
Makapamarayeg ba ang mga kabos kanato ug makadawat og abi-abi nga miila sa ilang tawhanong dignidad?