Lain na usab nga paagi ang nahuna-hunaan sa atong experts aron lang masumpo ang pagtinakdanay sa Covid 19. Wala na kadtong quarantine classification nga ECQ, MECQ, GCQ ug MGCQ. Kon dili, alert level 1,2,3,4 ug 5 na. Morag alert sa earthquake. Ang alert level 5 ang pinakataas. Pero ang mga restriction mao ra gihapon sa atong daan nga quarantine classification. Mao rang iro apan lain lang og ribbon.
Dili na tibuok rehiyon, probensiya o siyudad ang i-lockdown, kon dili mga balay, compound, kalsada, sitio, purok o barangay. Kanang granular lockdown ba. Pero ang problema kay ‘surprise lockdown’ na. Kana bang kinalit nga dili pahibaw-on ang mga lumolupyo sa lugar nga i-lockdown. Sus, kakuyaw ani.
Human sa dul-an duha na ka tuig nga lockdown sa nasud, adunay na-imbento nga bag-ong estratehiya ang atong gobiyerno unsa-on pagpakgang ang paghasi sa Covid 19. Dili na dinagko nga lockdown, kon dili ginagmay na lang. Pero dili ba ipahibawo sa apektadong mga lumolupyo. Pakalitan na ang tagbalay o mga lumolupyo sa usa ka karsada nga dili na sila makagawas ug wala na poy makasulod sulod sa 14 ka adlaw sa lugar nga ilhon nga high risk. Mao ni gitawag sa uban nga ‘lockdown de gulat’. Surprise lockdown ba.
Matod sa Department of the Interior and Local Government (DILG), importante ang element of surprise nga mora bag manakop sila og banggiitang kriminal. Ambot mas makatabang ba sa katilingban kon walay warning o pasidaan man lang kay aron walay kalit nga matanggong o dili na makagawas ug makasulod sa ilang panimalay.
Lain na sab nila ni karon nga experimento kay klaro man nga ang nag-unang mga pamaagi inay masanta ang Covid, misamot man hinuon sa paghasi. So, karon lockdown nga walay warning. Mo-ingon na lang ta sa tanan nga good luck kay lain na usab kining experiment sa atong gobiyerno. Ambot kon masaler ba kini sa pagpakgang sa pagkuyanap sa Covid 19? (bobbygnalzaro@gmail.com)