Nahimong kontrobersyal ang bakuna bubble ni Bise Mayor Michael Rama tungod kay ingon sa dunay diskriminasyon ngadto sa mga tawo nga wa pay bakuna. Ang kadto rang makapakita og mga card sa bakuna ang tugtan nga maka dine in sa mga restaurant. Ang kadtong wala, anha ra gyud sa gawas.
Sa tinud-anay lang, di ni una ug talagsaon nga ideya nga iyaha sa bise mayor. Mao ni ang sugyot sa dagkong mga opisyal sa business sector sa nasod. Nisugyot sila nga ang kadto lang bakunado ang makakaon sa sulod sa mga kan-anan.
Mao ni ang ilang nakitang usa sa mga paagi sa katawhan sa pagdasig sa pagpabakuna batok sa coronavirus disease 2019 (Covid-19) taliwa sa kadaghan pa sa mga tawo nga di gustong magpabakuna tungod sa nagkadaiyang mga rason ug kadtong mga tawo nga nagduha-duha pa.
Ang mga eksperto sa panglawas nagtuo nga ang bakuna lang ang sulbad sa giatubang nga krisis karon sa tibuok kalibutan. Gikinahanglan ang paspas nga pagpamakuna aron makuha ang herd immunity kon moabot na sa 70 porsyento sa populasyon ang mabakunahan.
Apan dinhi lang gani sa Pilipinas, ubos pa kaayo ang gidaghanon sa mga tawo nga nagpabakuna tungod kay daghan ang nangahadlok sa giingon nga dautang epekto bisan kon sa tinud-anay, wa pa kini konkretong kamatuoran.
Matod ni Michael Osterholm, director sa Center for Infectious Disease Research and Policy sa University of Minnesota in Minneapolis ug adviser ni U.S. President Joe Biden, duna pay laing pagsulbong sa mga kaso sa Covid-19 sa mosunod nga unom ka buwan.
Di mohunong ang kagaw kon di makapanakod sa tanang mga tawo, matod niya. Busa gikinahanglan nga mabakunahan ang tanan aron dunay igong ikasugakod ang tanan kon maigo sa virus. Makuha lang kini sa matag tawo kon magpabakuna batok sa Covid-19.
Apan ang nakapait, mas daghan ang mituo sa fake news kay sa tinuod.