Cell phone nga gi-charge nga mibuto maoy nakaingon sa sunog nga miugdaw alas 5:45 sa buntag sa Sabado, Septiyembre 18,2021 sa Purok Sunflower, Barangay Biasong, dakbayan sa Talisay.
Ang balay iya ni Raymunda Abrea, 50. Ang sunog nagbilin og P60,000 nga danyos.
Si FO1 Renzon Fier, imbistigador sa Talisay City (BFP) nga nahinabi sa mga tigbalita, nibutyag nga paspas kaayo ang kayo nga milamoy sa panimalay ni Abrea.
Si Abrea nibutyag nga nanglaba siya niadtong higayuna dihang kalit nga dunay sipang buto. Human sa buto, midilaab gilayon ang iyang kwarto.
Gibutyag niya nga dako iyang pagtuo nga ang selpon nga gi-charge sa ilang lawak nibuto ug maoy nakaingon sa sunog.
Nagpasalamat hinuon si Fier kay dali sab nilang napawong ang kayo, wala makakatap sa mga silingan nga balay ingon man walay nangaangol. (GPL)