Ang Cebu City Government pormal nang niabli sa unang tulo ka andana sa Sabado sa hapon sa Septiyembre 18, 2021 sa Cebu City Medical Center (CCMC) nga nahimutang sa eskina sa dan Panganiban ug Natalio Bacalso Avenue, aron pagdawat sa mga pasyente.
Sila si Bise Mayor Michael Rama ug hospital administrator Yvonne Cania, ingon man mga sakop sa Konseho, maoy nangulo sa pormal nga pagbukas sa unang tulo ka mga andana sa tambalanan.
Karong adlawa, Septiyembre 19, 2021, mag-clearing una ang tambalanan.
Sa Lunes, Septiyembre 20, ibalhin na ang mga pasyente nga di Covid sa bag-ong tambalanan gikan sa daan nga edipisyo sa Bureau of Fire Protection (BFP).
Ang tulo ka andanang edipisyo makapasulod og 200 ka mga pasyenteng non-Covid.
Dunay usab silay 48 ka beds alang sa mga nasakit og coronavirus disease 2019 (Covid-19) nga nagkinahanglan og isolation ug pag-atiman sa tambalanan.
Si Rama, sa iyang pagpamulong, niingon nga makapasigarbo na sila ni Mayor Edgardo Labella nga ang Dakbayan sa Sugbo duna nay “globally competitive hospital.”
Si Rama nisaad nga hangtod nga sila pa ang magdumala sa ryenda sa pangagamhanan sa Dakbayan sa Sugbo, di nila lung-an ang pagtrabaho sa nahabiling pito ka mga andana aron kini mahuman. (REV)