GRUPO sa Bangsamoro Islamic Freedom Fighters (BIFF) ang gitumbok sa mga awtoridad nga suspek sa pagpabusikad og improvised explosive device (IED) sa Datu Piang, Maguindanao alas 3:39 sa hapon, Sabado, Septiyembre 19, 2021.
Atol sa maong insidente walo ka mga tawo ang naangol nga giilang sila si Norodin Musa, 21; Fahad Tato, 22; Samsudin kadtugan, 21; Benzar Macogay, 24; Amid Miparanun, 19; Carlo Mobpon, 25; Tukoy Abo, 13; ug Mohamad Wanti, 29, mga molupyo sa Barangay Poblacion, Datu Piang, Maguindanao Province.
Gibutyag ni Maguindanao Provincial Police Office Director Colonel Jibin Bongcayao nga nagdula og basketball ang mga biktima samtang ang uban nanan-aw didto sa covered court sa municipal gym sa dihang kalit lang mibusikad ang IED.
Tungod sa kakusog sa impak sa pagbusikad, naigo ang mga biktima sa mga tipaka sa bomba.
Abtik nga nagresponde ang mga pulis ug sundalo diin gisapupo ang mga samaron ug gipangdala ngadto sa Maguindanao Provincial Hospital.
Usa sa mga biktima giingong anaa karon sa grabeng kahimtang human maigo ang iyang kuto-kuto, duol sa dughan.
Grupo sa BIFF ang gitudlo nga suspek sa mga awtoridad nga una nang nabahad nga subling mamomba sa dapit.
Gikondena ni Maguindanao Second District Congressman Esmael "Toto" Mangudadatu ug Datu Piang Mayor Victor Samama ang niluog nga gihimo sa mga terorista.
Padayon pang gisubay sa mga pulis sa Datu Piang Municipal Police Station ang mga suspek aron dakpon ug pasakaan og kaso. (Edgar E. Fuerzas)