NAKAPLASTAR na ang P20 million nga traffic signalization system sa Siyudad sa Mati, Davao Oriental nga ipatuman sa dili madugay.
Kabahin niini, gihimo sab ang test run Septyembre 17, 2021, sa upat ka junctions diin nakaplastar ang traffic lights.
Sa report sa City Information Office sa Mati, ang test gipangunahan sa City Traffic Management Office, City Public Safety Office, ug Traffic Supplies and Construction Corporation, ang samang kompaniya nga nag-manage sa traffic signalization system sa Tagum City.
Gipailawom sab sa briefing ug orientation ang mga personahe sa Mati Traffic Management Office sa bag-ong sistema sa trapiko.
Aron sab mas mapasabot ang mga draybers, gipanghatagan sila og flyers aron makat-on sa mga basic sa traffic lights.
Ang P20 million city traffic signalization project gisugdan, Abril 8, 2021, usa sa mga proyekto ni Mayor Michelle Nakpil Rabat. (Jeepy P. Compio/Mati CIO)