PAREHONG samdan ang asawa ug mga anak sa bana nga nagselos ug mi-hostage sa asawa didto sa Purok 5, Barangay Bankerohan Sur, Montevista, Davao de Oro alas 6:10 sa gabii Sabado, Septiyembre 19, 2021.

Biktima mao sila Myraflor Calpo ug mga anak nga sila Ronald, Raymart ug Rincess, samtang ang suspek mao ang bana nga si Rommel LYU Calpo, 43, parehong molupyo sa nahisgutang dapit.

Sa gihimong pakighinabi sa SunStar Superbalita kang Police Corporal Rogelio E. Golo, Jr., imbestigador sa Montevista Municipal Police Station, gisaysay niini nga hubog nga miuli sa ilang balay ang bana nga nagbitbit og sundang.

Matud pa nga buot makig-istorya ang suspek sa iyang asawa apan ang asawa dili makig-istorya, inay misulod sa kuwarto.

Tungod sa kasuko sa bana, gisundan ang asawa sa kuwarto. Apan sumala pa nga sa kahadlok sa asawa, midagan kini padung sa balay sa silingan.

Gigukod sa suspek ug gikulata nga maoy nakit-an sa anak nga si Ronald, hinungdan nga gibunlot ang sinina sa suspek

Nasuko ang suspekm, busa mihulbot sa gitakin nga sundang hangtud nga nag-inilogay sila sa anak sa sundang nga miresulta sa pagkasamad sa kamot ni Ronald.

Sa maong higayon, mitabang ang laing duha pa ka mga anak nga sila Raymart ug Rincess ug ilang gibunalan og kahoy ang ilang amahan ug pugsanong giilog ang sundang nga gihuptan niini nga misulta sa ilang pagkasamad.

Miabot sa punto nga gi-hostage sa suspek ang iyang asawa sulod sa balay hangtud nga nahitabo ang negosasyon nga milungtad og kapin usa sa oras una nadakpan ang suspek sa mga pulis.

Parehong nakahiagom og samad tinigbasan sa kamot ug bukton ang mga anak sa suspekm samtang ang asawa niini nakahiagom og bun-og sa lawas ug samad tinigbasan ug gidali pagdala ngadto sa Davao De Oro Provincial Hospital aron matambalan.

Gibutyag ni Golo nga selos ang hinungdan sa maong krimen ug napriso na sa Montevista Municipal Police Station ang suspek samtang gihikay ang tukmang kasong ipasaka batok kaniya.