Gihatagan og dakong dungog ni Carlo Biado ang nasod human midaog kini sa prestihiyoso nga US Open Pool Championship kagahapon didto sa Harrah’s Resort, Atlantic City, New Jersey.
Biente-siete pud ka tuig ang gihuwat sa mga Pinoy aron ma-angkon pagbalik ang US Open sukad giharian kini ni pool legend Efren “Bata” Reyes niadtong tuig 1994.
Gilupig ni Biado si Aloysius Yapp, 13-8, sa championship round aron aswaton ang titulo ug ibulsa ang $50,000 o mokabat ngadto sa P2.5 milyones nga premyo.
Sa awarding ceremony, emosyonal ang 37-anyos nga bilyarista kay natuman na gyud ang dugay niyang gipangandoy.
Impresibo ang gipakita sa lumad nga taga La Union diin midaog kinig 10 ka straight racks aron papason ang 3-8 nga biya og daogon ang torneyo sa iskor nga 13-8.
Nakasulod si Biado sa championship match human niya gilupig ang Japanese nga si Naoyuki Oi, 11-9. (RSC)