Nagtinubagay ang bantamweight champions nga si Johnriel “Quadro Alas” Casimero ug Nonito “Filipino Flash” Donaire Jr. sa usa ka Facebook post nga maoy nakapadugang sa kahinam sa boxing fans sa panagsangka sa duha ka Filipino fighters.
Nagsugod ang maong tinubagay sa post ni World Boxing Organization (WBO) champion Casimero.
“Aba Tika Nonita (Nonito) nag-iingay ka na naman diyan baka pag patulan kita aatras kana naman ha, siguraduhin mo malakas kana. Donaire lights out. Tapos na ang laban,” post ni Casimero nga adunay hashtag nga #EasyWork.
Sa wa damha, gitubag kini ni World Boxing Council (WBC) bantamweight champion Donaire.
“Naunsa ka dong? Ni demanda ka nga dili ko mo-atras sa kontrata tungod sa trashtalk og nituman ko basta mo tuman sad ka para VADA testing. Mao nang dunay mga kontrata gipadala nimo para pirmahan nimo! Patan-aw og doctor dong! Nadaot naka? Natog ka.,” ang reply ni Donaire sa post ni Casimero.
Mitubag pagbalik si Casimero nga wala siyay nadawat nga kontrata apan andam siya sa ilang away.
“Wala kay kopya sa kontrata pero saba kaayo ka sa imong mga live bahin sa akong demanda pero wa nimo gi apil og saba-saba imoha? Nisulti paka sa imong vlog nga ngano mu pirma ka para magka fight ta? Naay kopya imong amo sa kontrata, si Sean Gibbons, pero dili na niya e-mail nimo diha sa Ormoc. E-unblock kaha na imong “Viva Team” sa Messenger nimo do? Ubay-ubay na baya ka gipang potbal. Diba?,” batbat pud ni Donaire.
Ang duha ka boksidor pulos mga Bisdak, si Casimero (31-4, 21 KO) lumad nga taga Ormoc samtang si Donaire (41-6, 27 KOs) gikan sa Talibon, Bohol.
Mag-abot unta ang duha niadtong Agusto alang sa title unification apan wala kini madayon kay mi bak-awot man si Donaire sa maong away tungod sa issue sa VADA testing ug mga trash talk diin nalabot na ang asawa niini.
Gipulihin si Donaire ni Guillermo Rigondeaux, kinsa gipilde ni Casimero pinaagi sa split decision aron madepensahan iyang titulo. (RSC)