Miabot na og 50 porsiyento sa eligible population sa dakbayan sa Mandaue ang hingpit nang nabakunahan sa duha ka doses batok sa Covid-19, sumala sa information office sa dakbayan.
Sa Facebook post sa Mandaue City Public Information Office (PIO), gipahibalo niini nga ang Mandaue maoy unang local government unit (LGU) nga nakaabot sa 50 porsiyento sa pagbakuna sa eligible population.
Base sa Septiyembre 17 nga talaan, ang Visayas Vaccination Operation Center (VVOC) nitaho nga ang Mandaue City nakahimo og kinatibuk-ang 327,345 doses sa vaccines diin 73,334 doses (56.38 percent) alang sa first dose ug 154,011 doses (50.09 percent) alang sa second dose.
Si Mandaue City Mayor Jonas Cortes, sa iyang pamahayag, mapasalamaton sa mga residente ug health workers sa dakbayan sa pagsuporta sa vaccination program batok sa Covid-19.
Iyang giawghag ang uban nga magpabakuna na sa vaccination sites.
“This is our main protection against Covid-19,” matod ni Cortes.
Ang Mandaue dunay lima ka vaccination sites nga naa sa Mandaue City Cultural Sports Complex, University of Cebu Lapu-Lapu- Mandaue (UCLM) branch, Pacific Mall, Parkmall, ug J Center Mall.
Kini mo-operate gikan sa Lunes ngadto sa Biyernes, alas 8:00 sa buntag ngadto sa alas 5:00 sa hapon.
Samtang, matag Biyernes sa gabii, ang Mandaue abli sa night vaccination gikan sa alas 4:00 sa hapon ngadto sa alas 9:00 sa gabii ug matag weekend, dunay mobile vaccination clinic nga mosuroy sa kabarangayan. (KFD)