SUPERBALITA CEBU

Akusasyon dili patas

Hirit

Ang Philippine Drug Enforcement Agency (PDEA) 7 nidapig ug nibutyag nga dako og natampo sa pagtibugsok sa supply sa illegal nga druga sa Central Visayas (CV) ug sa tibuok nasod ang gubat batok sa gidiling drugas ni Presidente Rodrigo Duterte.

Sukwahi kini sa akusasyon sa grupo sa oposisyon ug tinguha sa International Criminal Court (ICC) nga ilang ipadayon ang imbestigasyon sa war on drugs batok ni Duterte.

Gitinguha karon sa ICC nga ablihan pagbalik ang imbestigasyon sa war on drugs sa Pilipinas nunot sa alegasyon nga adunay nahitabong extra judicial killings (EJK).

Sigun sa report nga magsugod ang ilang pakisusi sa 2011 sa dihang mayor pa si Duterte sa siyudad sa Davao ug 2016 hangtod sa Marso 2019 diin giingong gihingusgan ang kampanya batok illegal nga drugas tungod sa kadaghan sa mga nakalas sa maong gubat.

Apan si PDEA 7 Director Levi Ortiz nagkanayon nga ang war on drugs karon dakog natampo sa pagkunhod sa supply sa illegal nga drugas itandi sa nanglabay nga katuigan.

Kaniadto, adunay daghang inilang drug lords nga padayon sa ilang illegal nga negosyo, apan sa dihang gisugdan ang gubat sa drugas, nangamatay ang mga dagkong durugista ug ang uban na missing ug nabalhog sa bilanggoan.

Sumala sa napatik nga taho, nakatampo usab ang war on drugs sa pagkunhod sa crime volume sa tibuok nasod sanglit usa sa tinubdan sa krimen ang illegal nga drugas man, sigun ni Ortiz.

Matod niya, kon kaniadto daghan ang gipangpusil nga nasaypan nga asset sa mga awtoridad nga mosulod sa mga dapit nga adunay daghang namaligya sa illegal nga drugas, apan karon, ang mga drug user na ang nangahadlok.

Sa panahon usab ni Duterte, gibutyag ni Ortiz, ang mga drug user ug pusher ang mitahan sa ilang kaugalingon tungod sa programang Oplan Tokhang kun tuktok hangyo.

Ning nagkaduol na nga matapos ang termino ni Duterte, gihatagan og perfect nga grado ni Ortiz ang presidente kay siya lamang matod pa, ang nanghingusog nga puhagon ang illegal nga drugas sa nasod.

Giangkon hinuon niya nga lisod ang pagwagtang sa problema sa illegal nga drugas sa nasod kay gani ang ubang mga advance nga nasod sama sa America, wala man kini makapuhag sa problema sa illegal nga drugas.

Insakto gyud ang komentaryo ni Ortiz. Kon dili si Duterte ang nahimong presidente sa nasod, unsa na kahay kahimtang sa Pilipinas? Seguro, padayon ang pagkabulahan sa mga sindikato sa gidiling drugas. Ang nasod mahimong kontrolado sa druglords. Ang labing subo, daghang Pinoy nga adik ug nalisoan sa pangisip.

Ang ICC walay pagpakabana niini human dili sila mga Filipino. Makaduda hinuon ang ilang baroganan kon asa nakapusta o nakadapig.

Tinuod, dili hingpit ang panaad ni Duterte. Natural lang kini human ang maong problema dili masulbad sa usa ka termino sa presidente. Gawas pa, ang pandemiya sa Covid-19 nakabalda sa tanang aspeto sa kalihokan sa nasod. Ang ICC ug mga lokal nga kakunsabo buta ug hiwi ang ilang panan-aw.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph