Dihay misuway paghikog pinaagi sa pagkatkat ug paglukso gikan sa dako ug habog nga kahoy. Ang mga tawo nga gustong moluwas kaniya nangatkat sa kahoy ug nauyog kini. Nitingog ang gustong maghikog, “Ayaw mog sigig lihok diha, mahug gani ko, pamatyon ta mo.” Hadlok diay siyang mamatay.
Ang sobrang kahadlok sa kamatayon gitawag nga thanatophobia, gikan sa simbolo sa kamatayon sa Greeks nga si Thanatos. Ang kahadlok sa kamatayon ug ang kahadlok sa dagum nisangpot sa gitawag nga vaccine hesitancy. Sa laktod, daghan gihapon ang nahadlok nga mamatay sa bakuna batok sa Covid-19.
Apan duna bay gibakunahan nga namatay? Sumala pa sa Visayas Covid-19 Vaccination Operations Center (VVOC), labing menos 18 sa gibakunahan sa Sugbo ang namatay apan, ug mao kini ang importante, dili bakuna maoy hinungdan sa ilang kamatayon.
* * *
Si Mary Jean Loreche, tigpamaba sa VVOC, niingon nga ang 18 nga namatay sa Sugbo lakip sa 31 nga namatay sa Central Visayas nga natala sa VigiFlow, ang database sa adverse events following immunization (AEFIs), hangtod sa Septiyembre 14, 2021.
Ang 18 ka verified AEFI deaths sa Cebu anaa ra sa .0017 porsyento sa 1,009,073 ka mga tawo nga nakadawat sa labing menos usa ka dose sa bakuna sa tibuok Sugbo. Miabot na sa 782,526 ang fully vaccinated sa Sugbo hangtod sa Septiyembre 15.
Wa matino sa VigiFlow kon ang 18 ka AEFI deaths mga fully vaccinated na o first-dose recipients pa. Wa sab ibutang kon taga diin sila sa local government units sa Sugbo, ingon man ang ilang edad ug babaye o lalake ba.
* * *
Gawas niining kahadlok nga mamatay sa bakuna, nitumaw na sab karon nga kadtong gustong magpabakuna, magpili sa bakuna nga ilang gusto. Mao nga mas menos karon ang mitunga sa vaccination centers sa Metro Cebu. Maong nihinay ang pagbakuna.
Si Dr. Jeffrey Ibones, officer-in-charge sa Cebu City Health Department (CHD), miingon nga mas gusto ang mga tawo sa bakuna sa Pfizer, AstraZeneca ug Moderna.