Uyoan nga ‘mi-rape’ sa dalagita, gidakop

Uyoan gisikop human giingong iyang gilugos ug napaangkan ang iyang 14 anyos nga pag-umangkon.

Ang suspek ug biktima pulos nagpuyo sa bukirang dapit sa lungsod sa Sibonga.

Si Tonton (di tinuod niyang ngan), 18, ulitawo, way trabaho, gipusasan alas 9:30 sa Biyernes sa gabii, Septiyembre 17, 2021 sulod sa ilang balay sa mga sakop sa Anti- Kidnapping Group-Visayas Field Unit (AKG-VFU).

Si Police Lt. Zosimo Ravanes Jr., team leader, maoy nangulo sa joint operation uban sa mga sakop sa Sibonga Police Station.

Si Tonton nalutsan og warrant of arrest tungod sa kalapasan sa Section 266 sa Republic Act (RA) 8353 kun Anti-Rape Law nga giisyu ni Judge Francis Rainier Rodriguez Navarrete sa Regional Trial Court (RTC) Branch 93 sa lungsod sa Argao, nga gipetsahan og Septiyembre 16, 2021, nga walay piyansa nga gitugot.

Si Ravanes nga nahinabi sa Superbalita Cebu, nagkanayon nga si Jasmin (di tinuod nga ngan), nibutyag nga 13 anyos pa siya gisigehan sa paglugos sa iyang uyoan hangtud nga nabuntis siya ug nanganak niadtong Hunyo ning tuiga.

Matod niya, siya nahadlok nga motug-an sa nahitabo kaniya kay gihulga siya nga patyon ni Tonton.

“Nasakpan ni sa inahan sa suspek (iyaan sa biktima), nangutana sa bata dako lagi imong tiyan, buntis ka no?,” dugang ni Ravanes sa Superbalita Cebu.

Ang dalagita nga nahadlok wala gilayon motug-an, nanghimakak tungod sa kahadlok.

Hangtud nga midako ang tiyan ug dili na malilong nga buntis siya. Gisigehan siya sa pagpangutana kinsay amahan.

Ang dalagita nitubag nga mauwaw siya ug nahadlok kay ila rang paryente.

Ang ginikanan sa dalagita ug mismo ang inahan ni Tonton nagsigig sukna kinsay nakabuntis niya.

Mitug-an ang biktima nga ang iyang uyoan maoy nanglugos, dili lang makausa, kon dili sa makadaghang higayon.

Atangan siya sa iyang uyoan sa panahon nga suguon siya sa iyang amahan.

Sundon sab siya niini ug dalhon sa usa ka payag ug didto pahimuslan ang pagka babaye.

Subay niini, ang uyoan ni Tonton nga mikuyog sa kapulisan atol sa pagsikop kaniya sa mga pulis, gipusil sa alas 9:00 sa buntag sa Sabado, Septiyembre 18, 2021.

Si Carl (di tinuod nga ngan), 45, dunay kapuyo, samdan sa tuong pulso human pusila sa iyang pag-umangkon nga si Jovy, 23, kinsa nasikop sa kapulisan, apan naka-ipsot ang igsuon nga si Jeson (di tinuod nga ngan), 28.

Ang duha ka mga suspek kay mga igsuon ni Tonton.

Ang biktima mibutyag nga gipusil siya sa iyang pag-umangkon gamit ang usa ka airgun.

Nasuko kini kay gipasanginlan siya nga maoy hinungdan nga nadakpan ang ilang igsuon.

Nakalingkawas si Carl dihang gigukod sa magsuon nga nagdala og plamingko kay dunggabon. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph