Miluwas sa bata, patay

Usa ka ginang ang namatay human iyang giluwas ang bata aron dili madasmagan apan siya na hinuon ang naigo sa motorsiklo sa national highway sa Sitio Lamak, Barangay Don Antigua, lungsod sa Borbon, alas 7:10 sa gabii, niadtong Sabado, Septiyembre 18.

Si Lucila dela Peña, 59, minyo ug molupyo sa nahisgutang lugar, nakabsan sa kinabuhi sa alas 12:10 sa kaadlawon sa Dominggo, Septiyembre 19, sulod sa tambalanan sa lungsod sa Sogod.

Gitanggong si Junrey Alexander Agboles, 42, minyo. drayber sa motorsiklo ug taga Baragay Lamintak Sur, lungsod sa Medellin.

Si Police Staff Sgt. Rogelio Senadjan, sa Borbon Police Station nga nahinabi sa Superbalita Cebu, nagkanayon nga ang biktima naglakaw kini sa karsada padulong mopauli ug nakit-an niya ang usa ka bata, anak sa ilang silingan, nga paspas kaayong nagdagan, milabang sa national highway.

Matod ni Senadjan, pagkakita sa biktima, iyang gigukod aron birahon nga dili maigo sa motorsiklo, apan sakto kaayo sa paggukod niya ug siya maoy naigo sa motorsiklo.

Sa kusog nga impact, nabunal ang biktima ug nakaangkog kadaot sa nagkadaiyang bahin sa lawas.

Ang drayber sa motorsiklo lakip iyang angkas nga si Kim Tolero nalandig usab sa tambalanan uban sa biktima.

Apan kagahapon sa kaadlawon, ang bana nga si Anecito nipahibalo nga nabugtoan sa kinabuhi ang iyang asawa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph