MOKABAT sa P1.5 milyunes ang danyos sa sunog sa Lunes sa kaadlawon, Septiyembre 20, 2021 sa Salvador Extension, Labsalex, Barangay Labangon, Dakbayan sa Sugbo.
Tulo ka mga tawo ang nangaangol samtang laing usa ang gitabang kay naglisod sa pagginwaha. Usa usab ka person with disability (PWD) nga lalake, kinsang tipik sa balay nasunog na, daling giluwas sa mga bombero.
Matod sa Cebu City Fire Office (CCFO) nga 80 ka mga balay ang nangasunog, apan padayon pang gisusi sa Department of Social Welfare and Services (DSWS) kon pila ka mga pamilya o mga tawo ang apektado.
Ang kayo giingong nagsugod sa balay sa usa ka Richard Sumalinog Tagadiad, apan wa pa masayri ang hinungdan.
Ang nangaangol human makaangkon og mga bun-og giila sa CCFO nga sila si Jonas Gamora, 24; Gamaliel Bargamento, 27; ug Rommel Hermoso, 47. Ang naglisod sa pagginhawa giilang si Janus Parba, 38.
Ang alarma sa sunog nadawat sa kabomberohan sa alas 2:45 sa kaadlawon ug nakontrolar mga alas 3:44 kun dul-an usa ka oras sukad sa alarma.
Hingpit nga napawong ang kayo sa alas 4:13 sa kaadlawon. (REV)