HUMAN malangkat ang prestiyusong titulo sa 2021 US Open Pool, ang paglabni na sab og gold medal sa 2022 Vietnam Southeast Asian Games maoy target sa bag-ong Pinoy pool wizard nga si Carlo Biado.
Ang 37-anyos nga taga Nueva Ecija impresibong mipukan sa Singaporean nga si Aloysius Yapp, 11-8, sa finals sa US Open Pool niadtong Dominggo, Septiyembre 19, 2021 (RP time) aron paglangkat sa titulo nga dugay na’ng wala maangkon sa Pilipinas. Si Efren “Bata” Reyes, ang giilang “The Magician”, maoy unang Pinoy nga nakahimo sa ingon niadtong 1994 diin 11 anyos pa lang si Biado niadtong panahuna ug wala pa kini mahilig sa duwang billiard.
Human niadto, daghan na man tuod nga mga Filipino cue artist ang misuway pagsunod sa lakang ni Reyes sama nila ni Jose “Amang” Parica (2003, 2005) Rodolfo Luat (2006), Ronnie Alcano (2007, 2008), Dennis Orcollo (2012, 2014) ug Lee Van Corteza (2013) apan kutob ra sila sa runner-up finiosh sa maong kompetisyon.
Nagtuo si Biado nga si Yapp maoy usa sa mga lig-on gihapon niyang makontra sa Vietnam SEA Games.
“Paghahandaan nating mabuti and SEA Games, hindi tayo pahuhuli,” matod ni Biado human sa iyang kadaugan.
Ang presidente sa Billiards and Snookers Congress of the Philippies nga si Robert Mananquil mapasigarbuhon nga mipahalipay ni Biado sa maong kalampusan.
“Great and sweet victory for Carlo Biado and the Philippines despite the pandemic. Hardly had Biado the time to practice during the lockdown. In 2020 because of global lockdown, he practiced by himself in his pool table at home," pamahayag ni Mananquil. (JBM)