ANDAM mosaka og timbang si International Boxing Federation (IBF) super flyweight champion Filipino Jerwin Ancajas aron mo-challenge sa laing Pinoy world champions nga sila si Nonito Donaire ug JohnRiel Casimero.
Si Ancajas, kinsa naggunit og 33-1-2, 22KOs nga rekord, naggunit sa kasamtangan niyang bakus gikan pa niadtong 2016.
Sulod na sa siyam ka mga higayon nga iyang nadepensaan ang iyang kampyunato ug usa sa nahimo niyang challengers mao ang kababayang si Jonas “Zorro” Sultan.
Taodtaod na sab nga nagplano nga mosaka sa bantamweight division si Ancajas diin naghari sila si Donaire ug Casimero. Si Donaire maoy World Boxing Council (WBC) bantamweight king samtang si Casimero maoy World Boxing Organization (WBO) bantamweight champion.
Gipasabot ni Ancajas nga naghuwat ra siya sa desisyon sa iyang trainers kon kanus-a siya angayang mosaka og timbang.
Alang kang Ancajas, mao na kini ang saktong panahon nga manimpalad na siya sa mas bug-at nga timbang ug andam siyang makig-unay og kababayan kon mahatagan og oportunidad.
Mismong ang trainer ug manager ni Ancajas nga si Joven Jimenez misuporta sa desisyon ni Ancajas.
“What is important for a boxer is the opportunity to fight for a world championship. That is rare in the life of a boxer so if there is a chance to fight them then that is a huge opportunity,” batbat ni Jimenez sa gmanews.tv.
“If we keep waiting, what is going to happen with my boxer? If the opportunity is there we will fight even tomorrow. Jerwin has been a champion at 115 pounds for a long time, I should give him a chance to go up to 118 pounds.” (ESL)