IKA-49 ka tuig karon (Septiyembre 21, 2021) nga kasumaran sa pagdeklara ni kanhi Presidente Ferdinand E. Marcos sa presidential Proclamation Decree No. 1081 o ang pagbutang sa tibuok Pilipinas ubos sa Martial Law. Para kanato nga edaran na seguradong dili makalimtan ang maong balaod kay liboan ka mga Pinoy ang nangamatay, napriso, nasamdan ug nahanaw tungod niini.
Gamhanan kaayo niining panahona ang militar ug kapulisan. Giwala ang "habeas corpus" o ang kamandoan nga ipakita ka sa publiko ug husgado kung madakpan.
Ang ilang ma-pickup kay mahimong isulod sa "stockage" o "safehouse" bisan sa dugay nga panahon nga dili makahibalo ang ilang banay ug walay kaso nga ipasang-at. Giwagtang ni Marcos ang Kongreso ug nagporma siya'g Asembliya ug gihimo niyang parliyamentaryo ang porma sa panggamhanan diin iyang gibutang ang "banker" nga si Cesar Virata isip Prime Minister.
Gipahamtang niya ang "curfew" ug gipangdakop ang taga-oposisyon ug kadtong mga nagmartsa sa kadalanan.
Hangtud karon, sakit pa sa mga nabiktima sa Martial Law ang ilang nahiaguman bisan pa man kung pipila kanila nakadawat og kompensasyon isip mga "Human Rights Victims" gikan sa "hidden wealth" ni Marcos.
Nabuntog lamang kining pagpanglupig sa gitawag nga "Edsa People Power Revolution" ug ang mosunod anaa na sa atong kasaysayan.
Sama sa iladong kanta nga Bayan Ko nga "Ibon man may layang lumipad," ingon usab niini ang gibati sa katawhang Pilipino kaniadto.
***
Dili na mapugngan ang huyop sa hangin sa politika. Mas kulbahinam ang panghitabo sa kaulohan kay anaa nay mga personalidad nga seguradong modagan.
Ang Partido Demokratiko Pilipino–Lakas ng Bayan (PDP Laban)-Cusi faction niduso na sa tandem nila ni Senador Bong Go ug Presidente Rody Duterte samtang ang PDP Laban-Pimentel faction kay seguradong si Senador Manny Pacquiao ang padaganon. Nagdeklara na sab ang tandem nila ni Senador Ping Lacson ug Tito Sotto.
Sa laing bahin, wa pay klaro kung kinsa kanila ni Bise Presidente Leni Robredo ug Mayor Isko Moreno ang "standard bearer" sa oposisyon.
Init kaayo ang bingkil sa politika kay sugod na ang binanatay ug paglinabayay og lapok sa matag pundok.
Sa laing bahin, hangtud karon wa pay desisyon si Mayor Sara Duterte nga modagan kay nagsabot sila sa iyang amahan nga usa ra ka Duterte ang modagan sa hataas nga puwesto sa kagamhanan.
Magpasubli daw kining modagan isip mayor sa Davao ug gihangyo niya ang katawhan nga suportahan ang iyang amahan pagka-bise presidente.
Sa laing bahin, adunay balita nga naghulat lamang si Mayor Sara nga mahapsay ang tanan una siya modeklara nga modagan. Usa na niini kung asa siya nga partido mopasilong. Seguradong dili siya sa nagkagubot nga PDP-Laban o sa Hugpong ng Pagbabago kay regional party lang kini.
Posible kaha nga sa bag-ong Partido Pilipino sa Pagbabago siya mopasilong? Usa kini ka nasudnong partido nga dinhi mismo natukod sa Davao ug nisuporta sa administrasyon ni Presidente Duterte ug sa pagdagan unya ni Mayor Sara sa bugnong lugaynon karong 2022. Bantayan nato ni mga ka-super!