USA ka tunghaan kada barangay sa Davao City ang buksan alang sa pilot testing sa pagbalik sa face-to-face classes.
Kini ang gibutyag ni Davao City Mayor Sara Duterte atol sa radio program niini kagahapon sa Davao City Disaster Radio (dcDR).
Sumala sa mayor nga magbase sa risk assessment sa usa ka barangay ang pagtugot nga ihatag sa usa ka eskuwelahan alang sa pagpahigayon sa face-to-face classes.
Dugang sa mayor nga kini suma pa ang nasabutan sa Davao City Anti-Covid-19 Task Force.
Niya pa nga sa 182 ka mga barangay sa Davao City, usa lang ka eskuwelahan kada barangay ang tugutan apan wala pay natumbok nga mga tunghaan.
Gihulat pa sab sa lokal nga kagamhanan ang guidelines nga ipagawas sa Department of Health ayha ipagula ang Executive Order aron kini mapatuman.
Sayo niini Lunes, Septiyembre 20, 2021, gibutyag ni Presidential spokesperson Harry Roque nga giaprobahan na ni Pangulong Rodrigo Duterte ang face-to-face classes.
Sumala ni Roque nga limited lamang ang face-to-face classes ug didto lamang kini ipahigayon sa mga lugar nga ubos ang kaso sa Covid-19 infections. (Jeepy P. Compio)