GIPUTLAN og bukton sa kaugalingon anak ang iyang amahan dihang nakita niini nga gitigbas ang iyang igsuon.
Nahitabo ang pagpanigbas alas 3:50 sa hapon niadtong Dominggo, Septiyembre 19, 2021 didto sa Purok 4, Barangay Mapaang, Maco, Davao de Oro.
Sa imbestigasyon sa Maco Municipal Police Station, nasayran nga gipahibalo na lang ang kapulisan nga dunay mag-amahan nga nagtinigbasay sa Barangay Mapaang.
Sa pagresponde sa mga pulis, nasayran nga hubog ang amahan nga si Celso Montero Jr., 56. Hubog sab ang mga anak nga sila Jamel Montero, 34, ug Joey Montero, 28.
Samtang pauli, nagkalalis sila, mikuha og sundang ang amahan ug gitigbas ang anak nga si Jamel nga naigo sa iyang tuong bukton.
Sa dihang nakita sa igsuon nga si Joey, mikuha kinig kahoy ug gibunalan ang ilang amahan sa kamot, diin nalagpot ang sundang ug gipunit ni Jamel dayon gitigbas kini sa iyang amahan nga miresulta sa pagkaputol sa walang bukton niini.
Parehong gipangdala sa Pantukan District Hospital ang mag-amahan.
Wala pa sab naestablisar sa kapulisan unsay hinungdan sa ilang away.