MOABOT ngadto sa 79 ka bikers, motorcycle drivers ug mga tambay nadakpan tungod sa kalapasan sa health protocol atol sa dungan nga operation sa mga sakop sa kapulisan sa siyudad sa Sugbo, Cebu City Transportation Office (CCTO) ug Prevention, Restoration, Order, Beautification and Enhancement (Probe) team sa Barangay Busay niadtong Sabado, Septiyembre 18, 2021.
Sa 79 nga ilang nadakpan, 16 bikers, 15 ang motorcycle drivers, usa ka v-hire driver ug usa usab ka driver sa pribadong sakyanan.
Matod ni Police Lieutenant Colonel Wilbart Parilla nga gituyo kini tungod sa kadaghan sa mga reklamo nga ilang nadawat nga padayon gihapon ang pagdagsa sa mga rider ug bikers sa bukid nga wa na masunod ang health protocol ilabi na kon mohunong sila sa ilang tambayanan.
Gituyo nila nga Sabado ug Dominggo ang ilang paglusad sa checkpoint tungod kay daghan ang manaka sa Barangay Busay gumikan kay walay trabaho.
“Kini man gung adlawa, Sabado ug Dominggo mao ni ang pinaka usual gyud nga daghang mga biker nga manaka didto sa taas, and mao ni ang atong gituyo ato sad silang gi check kon mituman ba sila sa atong pasidaan,” matod ni Parilla.
Una nang niawhag si Parilla sa mga biker ug rider nga kon mosaka man sila sa bukid alang sa ilang pag exercise, magsul-ob lang silag mask aron malikayan ang tindakdanay.
Tungod kay adunay mga biker nga mangluwa samtang nagdagan ang ilang bisekleta ug dako ang posibilidad nga ang ilang laway mopunta sa nagsunod kanila.
Apan aduna pa gihapoy wala motuman niini hinungdan nga mohimo na silag aksyon nga masulosyonan kini aron malikayan ang tinkadanay.
Mihatag pa og laing semana ang kapulisan sa Siyudad sa Sugbo sa mga biker ug riders nga kon padayon nga magmagahi nga dili mosunod sa health protocol dinhi na sila mo recommend sa Emergency Operations Center nga hunongon na ang pagtugot sa leisure biking ug riding sa bukid.
“Sa ato nang giingong nga kon dili sila motuman, ato silang i-apprehend. Kon dili lang gihapon sila motuman kon gi-apprehend na, atong i-recommend nga atoang ipa hunong ang leisure biking,” dugang ni Parilla.
Nakasikop usab ang CCTO og 20 ka mga driver nga naatlan nga nag-park sa no parking area, wala magsul-ob og crash helmet ug 13 usab ka motor ang gipang impound tungod kay walay gipakita nga dokumento sama sa lisensya ug rehistro sa sakyanan.
Dugang ni Parilla nga ning nagkaubos na ang kaso sa Covid sa Dakbayan sa Sugbo, dili sila angay nga mokompyansa aron dili na mobalik pa ang gidaghanon sa mga natakbuyan sa virus.