Dear Noy Kulas,

Just call me Rona,25 years old. Imo kong reader sukad pa sa una.

Naa koy uyab since college. Mauwaw ta ko mosulti nimo but need kaay nako ang advice. Ako siyang professor and he is 42 years old na karon. Siya ang nag support nako aron makahuman ko and among secret ang among relationship. Nobody knows but kami ra gyud duha.

Mao na akong problema kay karon mabdos ko unya siya ang papa. Okay ra man unta kon single siya but married siya, Noy. Wala hinuon silay anak sa iyang asawa nga ga work sa abroad. Tagsa na lang kuno ang ilang communication. Gaplano siya nga mo file og annulment magkaminyo ming duha. Di ba laing tan-awon nga kaming duha magkakami unya minyo siya? Former pa nako nga maestro.

Please tambagi ko.

RONA

Ron,


Kalisod sab anang imong kahimtang karon. Kuyaw og mahibaw-an mo sa iyang asawa, magkaproblema mo og maayo kay mahimo kaayo mong makiha kay duna siyay kwarta nga ikabayad sa abogado. Wa ra bay asawa nga malipay kon mao nay mahitabo.

Natural malipay nang imong maestro nga nagmabdos ka kay nangita nag anak karon nga edaran na siya o naa na sa middle age. But kon dunay makahibawo nga ikaw mabdos ug siya ang amahan, sa kasayon na lang karon sa social media, kuyaw kaayong bulabugon mo ug magubot sila. Kana ra bang inyong kahimtang karon, naay ebidensya.

Samtang sayo pa, sultihi ang imong parents sa nahitabo nimo ug sa tinud-anay nga status sa imong uyab. Kini aron makatabang sila nimo sa imong pagsabak karon. Ayaw paglaum nga magpa annul siya sa kasal kay gawas nga taas ang proseso, lisod na pag prosper kon way igong basehanan nga mao ang psychological incapacity.

Ang hunahunaon mo karon ang bata nga imong gisabak, di siya. Pag-ampo sa Ginuo nga giyahan ka ug hatagan og kusog sa pag-atubang sa sulitan.

NOY KULAS

kulassuper@sunstar.com.ph