USA ka kompaniya nga nagbase sa Dakbayan sa Sugbo nga nagtanyag og beauty, cosmetic, home ug personal care giila sa Securities and Exchange Commission (SEC) nga usa ka investment scam human nasuta nga nag-solicit og investments sa publiko nga way lisensiya ug permiso.
Ang SCET Colleens Corp. nga dunay address nga Unit 2004 Grand Residences, dalan Apitong, Dakbayan sa Sugbo nangangkon nga dunay secondary license apan sa pag-imbestigar sa SEC Enforcement and Investor Protection Department (EIPD), nasuta nga nigamit kini og mga mini nga dokumento, sumala ni SEC Cebu extension office officer-in-charge Atty. Alma Marie Estrada-Dalena, kinsa nikutlo sa taho sa EIPD.
Ang SCET Colleens nagtanyag og daghang investment packages ug promos gikan sa P3,800 ngadto sa P1.08 million nga nisaad sa dakong kita nga mobalik nga lima ngadto sa walo ka porsiyento sa puhonan matag buwan ug ubang bonuses uban sa gamay o walay risgo.
“The public is reminded that any offer or promise of ridiculous rates of return will little or no risk is an indication of a possible Ponzi scheme,” dugang sa opisyla nga pamahayag sa opisyal sa SEC.
Sa Ponzi scheme, ang unang nibubo og puhonan mabayran gikan sa kita nga bag-ong nibubo og puhonan ug dili gikan sa kita sa ilang baligya sama sa kontrobersiyal nga Kapa ug uban pa.
Matod ni Dalena, kini nga pamaagi seguradong mosira labi na kon dili makakuha og igong bag-ong mamuhonan nga ibayad sa nahiuna.
Ang SEC nilusad og imbestigasyon human sa taho ug mg pangutana gikan sa publiko bahin sa legalidad sa operasyon sa kompaniya nga nagpailang multi-level marketing firm.
Giila sa SEC ang mga magdumala nga sila si Shara Jane Casao Chavez, Kay Anne Cuizon Leyson, Edith Francisse Villegas Tablante, Earn Sta. Rita Saguindel ug Artemio Tarona Ponce, Jr.
Sa website www.beautynailhairsalons.com ni Edith Francisse Villegas Tablante, sumala sa SEC, nipaila nga chief finance officer, niangkon sa responsiblidad sa isyu.
Sa advisory niatong Septiyembre 2, ang SEC nagkanayon nga ang mga naasoyng ngalan nga nalambigit sa operasyon gitaho nga ngadto sa Bureau of Internal Revenue (BIO) aron pagsusi sa tukmang buhis opmulta nga tulubagon sa kompaniya.
“May this serve as a fair warning to the public to always exercise extreme caution before making or placing their monies on entities that offer “too good to be true” investment packages similar to SCET Colleens Corporation especially during this pandemic,” sumala sa pamahayag sa SEC-EIPD.
Si Dalena niawhag sa publiko sa pagsusi sa SE, “You can always visit our website www.sec.gov.ph to check if the company that you wish to invest your money with has a license,” she said, adding “people who engage in investment taking also need to have a secondary license..” dason ni Dalena. (PR)