MALAMPUSON nga gilusad sa mga magtutudlo sa Lawaan National High School (LNHS) ang ManyChat nga sistema sa pag-apod-apud sa learning modules sa mga tinun-an subay sa nagpadayon nga distance learning nga gihimo tungod sa hulga sa pandemiya sa nasud.
Mao kini ang gipahibalo ni Jeffrey Seblero, ang principal sa LNHS.
Usa sa tinguha sa tunghaan mao ang paghatag og kasayon sa mga tinun-an nga maka-access sa learning materials samtang malikay sa pagtakboy sa coronavirus disease 2019 (Covid-19).
Pasabot ni Seblero nga sanglit sagad sa mga tinun-an anaa nay social media account, gigamit nila kini nga paagi nga makakab-ot sa sayon ug mas paspas nga pag-access sa mga tinun-an diin mahimo usab sila nga makapangutana.
“Actually, uploading ra unta among service ihatag sa ManyChat. Na-notice namo nga diri na sila mo-inquire,” matod ni Seblero.
Sa wala pa ang pagbukas sa klase, gipaubos ang mga magtutudlo sa pagtuon og pag-strategize kon unsay buhaton aron daling makuha ang modules og dali ra usab madawat sa mga magtutudlo ang answers niini.
Gawas sa maong paagi, gihatagan gihapon og kahigayonan sa tunghaan nga makakuha og hard copy sa modules ang mga tinun-an nga way internet o social media.
Naa pa sa general community quarantine (GCQ) ang probinsya, nagtinguha ang tunghaan nga mas mahimong bukas ang mga tinun-an sa pagpangutana usab sa mga magtutudlo.
Gidugang ni Seblero nga mopadayon gihapon pagdawat og late enrollees hangtod sa Septiyembre 30, 2021. (ANV)