BALIK sa trabaho isip acting mayor si Bise Mayor Michael Rama human ni-file sa iyang medical leave si Mayor Edgardo Labella sugod sa Septiyembre 20 hangtod Oktubre 3, 2021.
Kini aron magpahiling si Labella sa iyang mga doktor sa Manila aron mapadali ang recovery sa sepsis nga nadiskobrehan sa unang quarter niining tuiga.
Ang pagpa-check unya ni Labella sa Manila maoy labing una sanglit sa niagi niyang mga medical leave, dinhi ra siya sa Cebu City nagpatambal.
Kini maoy ika-lima nga medical leave ni Labella human nadiskobrehan ang iyang kondisyon nga nagsugod sa infection sa iyang dunggan.
Si Rama, sa iyang bahin, nanghinaot nga mapadali ang kaayohan ni Labella kinsa kon wala pa masakit, magpabilin ang ilang tandem sa 2022 elections sama sa iyang gipadayag atol sa iyang pagpamulong sa pagbukas sa tulo ka andana sa Cebu City Medical Center niadtong Septiyembre 18.
“Please join me to wish our beloved Mayor, Atty. Edgardo Labella, to be better as he gives attention to his medical concern in the next two weeks,” padayag ni Rama, kinsa iyang ikauban si Dondon Hontiveros isip acting vice mayor. (PAC)