KANHI pulis nga nahadlok sa mga hulmigas nga iyang giingong mopatay kaniya, iyang giunhan pinaagi sa pagduslit sa iyang balay hinungdan sa pag-ulbo sa sunog alas 2:39 sa kaadlawon Lunes, Septiyembre 20, 2021 sa 229 F. Salvador Ext., Sitio Labsalex, Brgy. Labangon, Dakbayan sa Sugbo.
Ang pagkasunog sa balay ni kanhi police Staff Sergeant Richard Sumalinog Tagadi-ad, hingkod, nadestino kaniadto sa Probinsiya sa Sugbo, niangin og 79 ka mga balay.
Si Carol Mosqueda, daycare teacher sa Brgy. Labangon nga nahinabi sa Superbalita Cebu, nagkanayon nga ang ilang mga silingan nakakita kang Tagadi-ad nga gihulagway nga sabog sa ginadiling drugas, nagdala og lighter, nagsige og pasiga.
“Nangita siya sa mga hulmigas, nagbitbit sa lighter kay duslitan niya. Nasugatan sa amo silingan, tama daw kaayo, nahadlok,” dugang ni Mosqueda.
Nagtuo ang mga silingan nga sa kahadlok niini sa hulmigas nga siya “patyon,” iyang giunhag duslit sa lighter sulod sa iyang balay.
Human sa pag-ulbo sa kayo sulod sa ilang balay, nakit-an si Tagadi-ad nga nidagan palayo, niadto sa usa ka bakery, nipainit og puto, nagbarogbarog nga nanigarilyo samtang ingon sa way nahitabo.
Nakit-an siya sa mga silingan hinungdan nga nakulatahan.
Si SFO1 Novo Erana, imbestigador sa Cebu City Fire Office (CCFO), nga nahinabi sa Superbalita Cebu, niingon nga kasong arson ang ilang ipasaka batok kang Tagadi-ad.
Duna na sila karoy tulo ka testigos nga ningbarog batok sa kanhi pulis.
Gani, usa sa mga saksi kinsa mopasaka og kaso, mao ang ig-agaw ni Tagadi-ad nga usa usab ka pulis, kinsang balay naugdaw sa sunog.
GIPRISO
Sa sinugdan, gikustodiya sa Labangon police si Tagadi-ad aron di na makulatahan sa mga tawo, apan alas 11:45 sa buntag sa Lunes, gibalhog na siya sa police station aron pasakaan og kasong arson.
“Sige ni siyag bisyo sumala sa mga silingan, suyop shabu. Unya nagtama daw sa wala pa mahitabo, nagdalag kandila nagdaob sa taas,” dugang ni Erana.
Si Tagadi-ad nga giingong nag-inusara sa pagpuyo, makadaghan nang higayon nga magdaob og kandila sa second floor sa iyang balay kon makasuyop.
Makadaghan na gibadlong sa mga silingan ug ilang mapawong ang kayo.
Ang ground floor sa balay kongkreto apan sa taas kahoy hinungdan nga dali kaayo ang kayo mikatap.
Si Police Major Janelito Marquez, hepe sa Labangon Police Station nga nahinabi sa Superbalita Cebu, nihulagway nga duna gyoy deperensiya sa pangisip si Tagadi-ad.
Ang impormasyon nilang nakuha nga na-depressed ang kanhi pulis ug mangayo na lang sa mga kauban niini nga pulis ug magsuroy suroy.
Ang sunog gialarma mga alas 2:45 sa kadlawon, na under control alas 3: 44 ug hingpit nga napawong alas 4:13 sa kaadlawon.
Ang sunog mibilig danyos nga P1.5 milyon, 80 ka balay naugdaw, 113 ka pamilya na apektuhan kun 460 ka individual.