SI Presidente Rodrigo Duterte niaprobar sa pagpahigayon og limitadong face-to-face nga mga klase sa piniling mga tunghaan sa mga dapit nga giisip nga “low-risk” alang sa coronavirus disease 2019 (Covid-19), matod ni Presidential Spokesperson Harry Roque sa Lunes, Septiyembre 20, 2021.
Sa usa ka press conference, si Roque niingon nga ang mangapil nga mga tunghaan determinahon sa Department of Education (DepEd) ug Department of Health (DOH) aron pagseguro nga ang pagpanakod sa coronavirus mapugngan atol sa pagpahigayon sa atubangay nga klase.
Matod niya nga ang lokal nga kagamhanan sa nahingtungdang dapit kinahanglang mopadayag sa iyang pagsuporta sa pagpabalik sa face-to-face classes, samtang dunay written consent gikan sa mga ginikanan nga nagtugot sa ilang mga anak sa pagtambong sa atubangay nga klase.
Matod ni DepEd Secretary Leonor Briones nga sila nalipay sa hukom ni Duterte.
“This is wonderful, this is a great day tungkol sa edukasyon dito sa ating bansa,” matod niya sa usa ka press conference.
Base sa giaprobahan nga guidelines, ang mga klase sa Kindergarten hangtod sa 12 ka mga tinun-an, samtang ang Grade 1 ngadto sa 3 duna lay maximum nga 16 ka mga tinun-an. Ang klase molanat og hangtod sa tulo ka oras ang labing dugay.
Ang technical vocational classes, sa pikas bahin dunay 20 ka mga tinun-an.
Matod ni Briones nga usa ka assessment ang ipahigayon nga regular aron pagsusi sa gikinahanglang adjustments nga ipatuman.
“Kung safe ang pilot and it is effective, then we will gradually increase. Pero ang mahalaga ditto, bantayan natin kung ano ang risk assessment. Pag may pagbabago sa risk assessment, then talagang titigilin natin,” siya nagkanayon.
Alang sa school year 2021-2022, mga 8.2 milyunes ka mga tinun-an ang gi-enrolled alang sa blended learning system nga gipatuman sa kagamhanan taliwa sa Covid-19 pandemic.
Kini nga numero mas taas kon itandi sa 26.2 million nga total enrollees sa 2020 ug sa pre-pandemic nga gidaghanon nga 27 million ka mga tinun-an.
“Ito ay nagpapakita na nakikinig sila sa paliwanag ng ating department at tinatanggap nila ang strategy at approach namin, ‘yung blended learning,” matod ni Briones.
Gikataho nga dunay tunghaan sa Lalawigan sa Sugbo nga naapil sa face-to-face nga klase, apan ang DepEd wa pa moluwat og pamahayag.
Si Gobernador Gwendolyn Garcia dugay nang nangusog alang sa atubangay nga klase kay alang kaniya lisod ang way atubangay aron pagkat-on og maayo sa mga bata.(SunStar Philippines)