Roland Lo
Sanciangko S. Cebu City
MAKABALAKA ang mga taho nga hinay kaayo ang mga pagpamakuna sa mga vaccination center dinhi sa Sugbo nga maoy nagtukmod sa mga local government unit (LGU) sa pagpasiugda og mga pakulo. Ang mga Dakbayan sa Lapu-Lapu, Cebu ug Mandaue dunay mga drive thru nga vaccination site. Wa na kinahanglana pang molinya og taas kay mahimo nga anha ka ra sa imong sakyanan bakunahan.
Ang Dakbayan sa Talisay usa sa mga LGU nga nagpasiugda og raffle promo aron pagdani sa mga tawo nga magpabakuna.
Ang Dakbayan sa Sugbo nagmugna og bakuna bubble diin ang kadtong nakapabakuna lang ang maka dine in o makakaon sa sulod sa mga kan-anan nga airconditioned. Kadtong di, igo rang makapalit o sa gawas lang kutob.
Girekomendar usab kini sa dagkong mga negusyante aron madani gyud ang mga tawo sa pagpabakuna.
Nabalaka ang Center for Disease Control (CDC) sa dagan karon sa coronavirus disease (Covid-19) kay paspas ang pagpanakod mga variant, labina ang Delta. Gawas nga paspas ang pagpanakod, mas isog ang kagaw.
Nabalaka ang CDC kay magkadugay ang kalangay sa pagpamakuna, magkaisog ang kagaw kay mo-evolve o mag usab usab ni samtang magbalhinbalhin og laing tawo. Nabalaka ang CDC nga moabot ang kagaw nga makasukol na og bakuna busa useless ang pagpatusok.
Ang bakuna lang ang bugtong paagi nga di makapatuyang sa pag usab usab ang kagaw kay kon di kini mamatay sulod sa lawas sa nabakunahan nga tawo, luya na kini kon makatakod man sa lain. Apan kon di bakunado ang tawo, mas isog nga kagaw ang mobalhin ngadto sa laing tawo nga natakdan.
Daghan ang mga fake news nga nanggawas. Usa ani mahimo kunong zombie ang mabakunahan. Kon mahimo pang zombie, nganong ang dagkong mga lider sa dagkong mga nasod sa kalibutan mao pay nag-una una sa pagpabakuna. Bisan ang mga opisyal sa dagkong mga organisasyon sa panglawas, sama sa World Health Organization (WHO) nagpabakuna. Sa ato pa, luwas kini gamiton sa tawo busa way bisan usa kanila nga nahimo nga zombie.
Di usab makamatay ang bakuna. Namatud-an na kini sa mga doktor dinhi sa Pilipinas. Duna may nangamatay sa nabakunahan, di Covid ang ilang namatyan. Kon duna man, daghan kaayo sila og gidala nga mga sakit.
Di usab tinuod nga ang mga gama nga bakuna sa China sama sa Sinovac, di epektibo batok sa Covid-19. Apan daghan sa mga medical personnel nga unang nabakunahan og Sinovac napanalipdan. Duna may nangasakit nila, apan wa magrabehi og maayo.
Ayaw pagtuo sa fake news. Way angay kahadlukan sa bakuna. Ako mismo bakunado.