SUPERBALITA CEBU

Espinoza: Ang face shield dekorasyon lang?

NAGPAKABANA

PAHALIPAY sa mga Mandauehanon ug sa mga opisyales, labina sa mga health workers, nga tungod sa maayo nga kooperasyon sa usag usa nakab-ot ang 50 porsento sa mga nabakunahan batok sa Covid-19. Matud sa Public Informaiton Office, ang dakbayan sa Manduae maoy nag-una dinhi sa Metro Cebu sa gidaghanon sa mga kwalipikado nga nabakunahan na.

Sumala sa taho sa Visayas Vaccination Operation Center (VVOC) niadtong Sept. 17, 2021, ang dakbayan sa Mandaue nakaalagad na og 327,345 ka dosis sa premiro nga bakuna ug 173,334 ka dosis sa kumpleto na nga bakuna. Ang dakbayan sa Mandaue dunay 422,463 ka tawo nga mahimo mabakunahan batok sa Covid-19 samtang 307,454 ang mga nag-edad og 18 anyos.

Gipasalamatan ni Mayor Jonas Cortes ang mga Mandauehanon sa pagsuportar sa vaccination program sa dakbayan. Lain pay komedya, dili mga gahi’g ulo ang Mandauehanon. Ato usab makita nga hataas ang pagsabot ug pagtuo sa taga Mandaue sa bakuna batok sa Covid-19 ug dili sila talawan sa dagum sa injection.

Ang dakbayan sa Mandaue dunay lima ka vaccination centers: Mandaue City Cultural Sports Complex, University of Cebu Lapu-Lapu- Mandaue (UCLM) branch, Pacific Mall, Parkmall ug J Center Mall.

Basi sa DOH Central Visayas Covid-19 Case Bulletin niadtong Domingo, Sept.19, 961 na lang ang active cases sa dakbayan sa Mandaue samtang 32 ang bag-o nga kaso ug usa ra ang natala nga namatay.

Ang aktibo nga kaso sa Covid-19 sa dakbayan sa Cebu mikanaog usab ngadto sa 2,744 ug dunay 84 ka bag-o, apan dunay 53 natala nga namatay. Ang dakbayan sa Lapu-Lapu dunay 1,1884 nga aktibo nga kaso sa Covid-19 ug 22 ka bag-o nga kaso, apan walay gitaho nga namatay.

Ang Probinsya sa Cebu miubos usab ngadto sa 3,322 ang aktibo nga kaso sa Covid-19 samtang dunay 103 ka bag-o nga kaso ug walay natala nga namatay ani nga panahon. Maayo unta og magpirmi ang pagtuman sa katawhan sa minimum health protocol sama sa pagsul-ob sa facemask ug face shield kon anaa sa publiko ug paglikay sa tapok-pundok.

Apan karon ang pagsul-ob sa face shield usa na lang ka pagtuman sa regulasyon nga dili makasulod og establisamento, simbahan ug uban dapit kon walay face shield. Gani, matawag nato nga mora na lang og dekorasyon ang face shield kay ang kadaghanan sa mga tawo igo ra itungtong sa ilang ulo ang faceshield.

Niadtong Domingo misimba mi sa Talamban parish church. Mibalik ko sa sakyanan aron pagkuha sa akong face shield kay di ko pasudlon sa gwardiya. Apan nahingangha ko sa akong pagbalik-sulod kay ang akong gisundan nga tawo ang iyang face shield gitungtong ra sa iyang ulo apan wa gibadlong sa gwardiya.

Unya, ang kadaghanan sa tawo sa sulod sa simbahan wa na mosul-ob sa ilang face shield. Ang uban gibutang ra sa lingkoranan ang face shield samtang ang uban naa sa ilang ulo gibutang. Gani, sa wa pa magsugod ang misa dunay ko gimaymayan nga batan-on nga naglingkod sa akong luyo nga isul-ob ilang face shield. Sus, igo ra ko nila ni gitutukan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!