ANGKUNON og suway sa Meralco Bolts ang nahabiling luna sa top two sa ilang pagpakigbatok sa NLEX Road Warriors sa premirong duwa karong alas 3:00 sa hapon, Septiyembre 22, 2021, sa hinapos nga bahin sa elimination round sa Philippine Basketball Association (PBA) Philippine Cup sa Don Honorio Ventura State University Gym sa Bacolor, Pampanga.
Ang Bolts kasamtangang nagpatong sa ikaduhang puwesto dala ang 7-2 nga rekord apan nagkinahanglan pa sila nga makabaton og usa ka daog sa nahabilin nilang duha ka mga duwa una nila maseguro ang No. 2 nga puwesto.
Mahinungdanon ang pagsulod sa top two gumikan kay nagtangag kini og twice-to-beat nga bintaha sa quarter-finals.
Kon mapilde ang Bolts ning sangkaa, aduna gihapon sila’y kahigayunan nga makaangkon sa No.2 kon modaog sila sa katapusan nilang duwa sa elimination round batok sa defending champion Brgy. Ginebra Gin Kings.
Ang Road Warriors, nga mosagubang sa katapusan nilang tahas, nagbitay sa ikapitong dapit bitbit ang 5-5 nga rekord.
Nagkinahanglan silang modaog ning sangkaa aron makaseguro og puwesto sa quarter-finals.
Gilaumang magsagubang og malisod nga tahas ang Road Warriors ning sangkaa gumikan kay mamalik na’g duwa ang duha sa mga pambato sa Bolts nga sila si Chris Newsome ug Cliff Hodge.
Nasayod si Road Warriors coach Yeng Guiao niini ug mao matod niya, nangandam sila'g maayo alang ning mahinungdanong sangka.
Sa main game, magsangka ang San Miguel Beermen ug Alaska Aces karong alas 6:00 sa gabii.
Ang Beermen, nga adunay 6-4 nga rekord, hingpit nga moangkon sa ikaupat nga luna kon modaog sila ning sangkaa.
Sa ilang bahin, ang Aces nagkumpayot sa ika-11 nga puwesto nga adunay 3-6 nga rekord.
Taliwala sa ilang sitwasyon, aduna pa’y poruhan ang Aces nga makakuha sa katapusang tiket sa quarter-finals kon modaog sila sa katapusan nilang duha ka mga tahas sugod ning kombatiha. (ESL)