Balay-balay, Tubig-tubig: Pagpatuman sa kompromiso

Dear Atty. Joan,

Ako si Juliet, inahan sa duha ka batang lalake. Nagbuwag na kami sa akong live-in partner nga maoy amahan sa akong mga bata.

Naa gihapon nako ang kustodiya sa mga bata. Usa ka overseas Filipino worker (OFW) ang akong kanhing kapuyo,

Tungod kay wa naman gayod kami nagkauyon, nagsabot lang kami nga mohatag siya og binulan nga suporta.

Pagpamatuod sa among kasabutan ang napirmahan namo nga compromise agreement. Nanotaryohan pod kini sa usa ka abogado.

Subay sa maong kasabutan, mahatagan ako og P30 mil matag buwan isip suporta sa among mga bata. Ako gihapon ang hatagan og kustodiya sa mga bata.

Dunay visitation rights ang amahan kon mopauli siya sa Pilipinas.

Apan huyang gihapon ang maong kasabutan. Dunay mga higayon nga dili masunod ang binuwan nga paghatag sa pagsustento. Duna mga panahon nga dili dayon ihatag sa iyang inahan ang sustento.

Labaw nga suliran mao nga gibutang diay sa maong kasabutan nga mahimo ra nga mobalibad ang akong ex-partner sa paghatag og suporta kon mahuman ang iyang kontrata abroad.

Bag-ohay lang nako nga nasakpan nga namakak diay ang amahan sa akong bata. Inay nga mo-end ang kontrata karong buwana, iyang gipagawas nga natapos ang iyang kontrata niadtong Mayo pa.

Mao nga nainsulto gayod ako sa maong pag-ilad niya kanako. Wala ko gatuo nga motraydor siya kanako ug sa akong mga bata.

Sa dihang nipirma ako sa compromise agreement, wala gayod nako basaha kini og tarong. Ang tinguha lang nako sa pagpirma mao nga dunay suporta ang akong bata.

Atty. Joan, unsa diay gibug-aton aning compromise agreement? Mahimo pa ba kining mausab ang unod ini? Unsa kahay angay nako buhaton?

Imong magtatampo,

Juliet

Dear Juliet,

Una sa tanan maayong adlaw usab kanimo diha Juliet ug salamat sa imong pagsunod niining lindog.

Ang compromise agreement kasabutan kini tali sa mga partido nga nipirma sa maong kasulatan nga naglatid sa mga butang nga angay nila sundon o himuon alang sa interes sa matag usa.

Kon sa hisgutan sa kustodiya, katungod sa pagbisita sa bata, ug paghatag sa ilang suporta, usa ka valid nga kasalutan ang compromise agreement inay nga magkinihaay pa atubangan sa korte.

Ang maong kasabutan maoy mogiya sa matag signatory sa agreement sa ilang mga responsibilidad alang sa ilang mga bata sama sa parental authority ug support. Mao kiniy mamahimong balaod tali sa mga ginikanan sa mga bata.

Mahimo pa kining mausab kon magkauyon ang matag partido sa kompromiso sa pag-usab niini. Sa imong bahin, mahimo kang musugyot sa imong ex-partner nga usbon ang ubang unod sa compromise agreement. Kon mouyon kini, mahimo kamo nga magpa-amyenda sa inyong kompromiso ngadto sa usa ka notaryo publiko.

Kon dili kamo magkasinabot, mahimo gayod ka nga musang-at og support case ngadto sa Family Court nga inyong nahimutangan aron maklaro ang pamaagi sa pagsuporta sa imong ex-partner kaninyo. Kon ma-file na ang kaso, mahimo gihapon kamo nga magkompromiso atubangan sa korte aron dili na magdugay ang kaso.

Daghang salamat Juliet sa imong sulat tampo ug hinaot nakahupay ang maong tambag sa naghuot mo karon nga galamhan.

Imong alagad,

Atty. Joan

[Lindog sinuwat nilang Atty Joan Dymphna Saniel-Amit, Executive Director, ug Atty. King Anthony Perez, usa sa mga abogado sa Children’s Legal Bureau. Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]