NALIPAY og dako ang mga residente sa Barangay Mudiang ug Barangay Buhangin Proper human sila gibisita ni Senador Bong Go aron dalitan og mga ayuda labi na nga nagpait ang tanan karon gumikan sa pandemya.
Sama sa naandan dunay mga grocery packs, vitamins, mask, face shield ug pipila kanila ang nakadawat og bike, sapatos ug computer tablet alang sa mga bata nga may magamit sa online class.
Nasayran nga sa matag uli ni Sen. Go sa dakbayan gikan sa Manila naa kini adtoon nga mga barangay labi na sa mga dapit nga tabangonon gayod.
"Padayon ang pagtabang sa gobyerno sa inyoha, labi na karon daghan ang nawad-an og trabaho, daghang negusyo ang nanirado, daghan naglisud tungod sa pandemya, suportahan nato si President Duterte, 76-anyos na, pero naningkamot gihapon nga magserbisyo sa inyoha ug malampasan ang krisis sa pandemya," sumala ni Go.
Dungan niini, isip chairman sa Senate Committee on Health, gi-awhag ni Go ang mga Dabawenyo nga magpabakuna kontra Covid-19.
Niya pa nga daghan na ang nangaabot nga mga bakuna, angay gayod nga hatagan og proteksiyon ang kaugalingon. (Jeepy P. Compio)