MOBALOR sa P168,000 ang kantidad sa gituohang shabu nga nakumpiska sa kapulisan gikan sa usa ka alyas Jerry sa gikasa nga buy-bust operation sa Toril Police Station alas 7:50 sa gabii niadtong Septyembre 20, 2021 sa Barangay Daliao, Toril District, Davao City.
Usa ka 54-anyos ang suspek kinsa giingong notadong tigpayuhot og ilegal nga druga sa Barangay Daliao.
Una niini, usa ka impormasyon ang miabot sa kapulisan nga nalambigit sa gidili nga druga ang nahisgutan hinungdan nga gikasa ang usa ka buy-bust operation.
Dihang gitunol na sa suspek ang shabu bugti sa salapi, dali kining giposasan sa awtoridad.
Kasong pagsupak sa Republic Act (RA) 9165 kun Comprehensive Dangerous Drug Act of 2002 ang ipasaka batok sa suspek didto sa korte. (Jeepy P. Compio)