SULBAD na ang problema sa agianan sa gibanabanang 200 ka mga pamilya nga nagpuyo luyo sa gate sa Villa San Jose sa Barangay San Jose, bukirang barangay sa dakbayan sa Sugbo. Ang Barangay San Jose kasikbit sa Barangay Talamban.
Ang tulo ka structures giguba sa Cebu City Government nga maoy nag-ali sa dalan ug maglisod ang mga tawo sa pag-agi.
Kini nga problema duha na ka dekada nga giantos sa gatusan ka mga residente.
Si Konsehal Jerry Guardo, chairman sa committee on infrastructure sa City Council, nagkanayon nga lima ka metros ang i-establisar nga karsada sanglit dili paigo ang 1.5 metros nga road-right-of-way nga maoy gilibre sa management sa subdivision.
Gumikan niini, ang City Hall nipalit sa laing 1.5 metros gikan sa private owners ug laing dos metros gikan sa land developer sa Villa San Jose.
Ang mga property owner nga apektado sa clearing operation bayran sa City Hall pinaagi sa pag-expropriate sa ilang yuta aron ma-construct ang gibanabana nga 300 metros nga karsada sa dili pa ang Oktubre 12 sanglit sirad-an na sa Villa San Jose ang ilang gate human nipabor ang korte sa ilang motion.
Si Guardo nagpasalamat ngadto sa management sa subdivision sanglit nihatag kini og taas nga lugway kay niadto pa unta kining sayong bahin niining tuiga sirad-an, apan nilanat pa kini og walo ka buwan ang ilang pasensya.
" The respondent is ordered to remove and close the gate at the back of Villa San Jose by enclosing the said portion of the subdivision with a concrete fence in accordance with the approved original subdivision plan," tipik sa mando sa korte nga gi-imposar niadtong Pebrero 8, 2021.
Ang gatusan ka mga pamilya adto moagi sa Villa San Jose nga dalan ug nangreklamo na ang property owner sa subdivision sanglit apektado ang ilang pribadong pagpuyo human gibuksan sa management alang sa mga residente nga nagpuyo sa luyo sa ilang propiedad sanglit wa silay laing agianan.
Gumikan sa pag-abli ug kon mahuman na ang karsada, makasulod na ang government responders sama sa truck sa basura, private vehicles ug mga bombero ug ubang emergency vehicles sa panahon sa ilang panginahanglan.(PAC)