DUNAY pasiaw nga nag-ingon nga gi-ban ni Satanas ang mga bombero didto sa impyerno. Ngano man? Nahadlok si Satanas nga kon makit-an sa mga bombero ang nagdilaab nga kayo sa impyerno.
Apan karon, di kaha maglibog ang atong mga bombero kon unsay ilang bunluton, hose ba o pusil? Gipirmahan ni Presidente Rodrigo Duterte niadtong Biyernes, Septiyembre 10, ang Republic Act (RA) 11589, ang Bureau of Fire Protection (BFP) Modernization Act, nga magtugot sa labing menos 2,000 ka mga bombero sa pagdala og pusil.
Apan makadala bag pusil ang tanang bombero? Dili. Ang makadala og pusil mao kadtong mga bombero nga sakop sa umulon nga Security and Protection Unit (SPU) sa matag rehiyon ug syudad. Kada SPU adunay 14 ka mga sakop.
Si Senador Ronald “Bato” Dela Rosa, nga nangamahan sa maong balaod, niingon nga adunay 17 ka fire regional offices ug 146 ka city fire stations sa tibuok nasod. Busa, mokabat lang sa 2,282 ka mga firefighters o 7.9 porsyento sa 32,800 ka mga sakop sa BFP ang armado. Mokabat sa P80 milyones ang gastuhon sa pagpalit sa mga pusil.
Ang duha ka team leader sa matag SPU kinahanglan nga adunay ranggo nga labing menos Fire Inspector. Samtang hatagan og priority nga matudlo nga sakop sa SPU kadtong dunay ranggo nga Senior Fire Officer III. Ang mga sakop sa SPU moagi og neuropsychological examination ug mga pagbansay.
Giklaro ba sa balaod ang paghatag og pusil sa mga sakop sa SPU? Kini nag-ingon, “That SPU shall be provided with the appropriate equipment to protect firefighters during fire suppression, containment of HAZMAT (hazardous materials) and CBRNE (chemical, biological, radiological, nuclear and explosive materials), fire investigation, and in the performance of all other acts pertinent to their mandate.”
Di tanan uyon sa armadong bombero kay ang ilang unang katungdanan mao ang pagpawong sa kayo. Apan si Presidente Duterte midepensa. Dunay mga higayon nga sa fire scene, may mga armadong nga manghulga sa mga bombero. Mangilog pa sa hose.
Ang maong balaod maglusad sa napulo ka tuig nga modernisasyon sa BFP. Busa mapaabot nga bag-o ug state-of-the-art na ang ilang mga ekipo.
Matod sa pangulo, “This will consistently guarantee our safety and become the source of pride. It is my hope that this milestone will further inspire the men and women of the BFP to hone their skills and expertise in areas of fire prevention and suppression as well as emergency, medical response..”
Gipalapdan ang ilang katungdanan nga naglakip na sa pagtubag sa natural ug man-made disasters. Mobulig sa rescue ug emergency medical services sa pakigtambayayong sa Disaster Risk Reduction and Management Council ug local government units. (edbarrita@gmail.com)