KASAMTANGAN nga gisirad-an sa kagamhanan sa Dakbayan sa Danao ang City Treasurer’s Office (CTO) niini human nataptan sa coronavirus disease (Covid-19) ang usa sa mga empleyado sa maong opisina.
Kini maoy gipahibawo sa lokal nga kagamhanan subay sa giluwatan nga kamandoan ni Danao City Mayor Ramon “Nito” Durano.
“This suspension is due to the recent circumstance where one of our employees in the said office was infected with COVID-19 virus,” saysay sa memorandum.
Sa kasamtangan, gipaubos sa isolation ang mga empleyado aron malikayan ang pagtakod sa ubang mga nagtungha.
Hinuon, pasabot sa kagamhanan nga dili na kinahanglan nga sirad-an ang tibuok munisipyo sanglit anaa sa lain nga edipisyo nahimutang ang CTO.
Subay sa uwahing datos sa dakbayan sa Danao, aduna kiniy 74 ka aktibong mga kaso sa Covid-19.
Ang opisina mosirado hangtod sa Septiyembre 27, 2021.
Alang sa mga emerhensya o urgent transactions, giawhag ang mga residente sa pagtawag sa Land Tax Division Office sa numerong (032) 266-9229 o sa Licensing Section (032) 260-2615.
Nanghinaot ang kagamhanan nga padayon nga sundon sa mga konstituente niini ang tanan nga mga lagda sa kagamhanan aron malikay sa Covid-19. (ANV)