SUPERBALITA CEBU

P16M nga shabu nasakmit sa 3 ka mga buy-bust

BIGTIME: Si Benjie Torreon Lupian, 42, lumad nga taga Getafe, Bohol, apan kasamtangan nga nagpuyo sa Block 1, Belgium Street, Barangay Suba, Dakbayan sa Sugbo, nakuhaan og 1,040 gramos sa shabu nga balor og P7 milyunes kapin. /Alan Tangcawan

MOABOT ngadto sa kapin P16 million nga balor sa illegal nga drugas ang nasakmit sa kapulisan sa dakbayan ug lalawigan sa Sugbo sa managlahing anti-drug operations.

Unang operation nga gihimo sa Mambaling Police Station sa alas 10:30 sa Lunes sa gabii, Septiyembre 20, 2021 nga gipangulohan sa ilang hepe nga si Police Major Dindo Alaras ubos sa pag-supervise ni Police Colonel Josefino Ligan, hepe sa Cebu City Police Office, sa B. Aranas Extension, Barangay Duljo Fatima, Siyudad sa Sugbo.

Sa operation ilang nadakpan ang giilang bigtime drug pusher sa Duljo nga si Benjie Torreon Lupian, 42, lumad nga taga Getafe, Bohol, apan kasamtangan nga nagpuyo sa Block 1, Belgium Street, Barangay Suba, Dakbayan sa Sugbo.

Nasakmit nila ang mga binulto nga gituohang shabu nga motimbang og 1,040 grams nga mobalor og P7,072,000.

Matod ni Police Lieutenant Colonel Wilbert Parilla, deputy city director for operations sa CCPO, nga niadtong 2019 nadakpan si Lupian sa mga pulis sa siyudad sa Sugbo, apan nakagawas tungod kay nakabenepisyo sa plea bargaining agreement.

Sa sulod sa bilangoan iyang nakauban sa selda ang iyag ig-agaw nga si alyas “John Laway” nga usa usab ka notadong durugista uban ni “Jake Libat” nga naa pa sa sulod sa bilanggoan nga mao usab ang iyang source sa illegal nga drugas.

“Kauban ni silang na priso didto sa city jail, karon kining duha si Jake Libat ug John Laway nga naa pa gihapon sila sa city jail. Then accordingly sila sad gihapon ang mo direct para makakuha og butang ni si Benjie,” matod ni Parilla.

Sa susamang oras, ang mga sakop sa City Drug Enforcement Unit nakasikop usab og computer technician apan namaligya og illegal nga drugas sa dalan Avocado, Barangay Mambaling, Dakbayan sa Sugbo.

Ang nadakpan giila nga si Bryan Osabel, 35, taga sitio Lawis, Barangay Pasil, diin nakuha gikan kaniya ang tunga sa kilo sa gituohang shabu nga mobalor tanan og P3.4 million. Si Osabel nadakpan na usab niadtong 2019 uban ni Joseph Tuñacao apan pulos nakagawas tungod sa plea bargaining agreement.

Niadtong 2020 si Tunacao nadakpan na usab sa mga puliso sa Leyte hinungdan nga nabilanggo karon sa Abuyog Penal Farm nga maoy supplier ni Osabel sa Dakbayan sa Sugbo.

Samtang sa probinsya sa Sugbo, dul-an sa usa ka kilo nga gituohang shabu ang nasakmit sa mga sakop sa Provincial Intelligence Unit sa pagpangulo ni Jeorge Francis Rodrin atol sa buy-bust operation sa sitio Sawsawan, Barangay San Roque, Siyudad sa Talisay.

Ang nadakpan giila nga si Kevin Avelis Panggo, 26, nga molopyo ra usab sa maong lugar.

Nakuha gikan kaniya ang binulto nga gituohang shabu nga adunay gibug-aton nga 900 gramos nga mo balor og P6,120,000. Gituohan nga gikan gihapon sa Luzon ang supply sa drugas nga nakuha kang panggo tungod kay giputos kini Chinese tea bag.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!