KON kunsomidor ka sa Visayan Electric, maka budget na unya ka sa gamit sa imong kuryente pinaagi sa Load-e.
Ang Load-e mora og load sa cell phone. Magpa load ka sa unsay makaya sa imong bulsa o igo ra sa imong gamit sulod sa usa ka panahon.
Kini ang gipahibalo ni Daryl Bonbon, Visayan Electric assistant vice president for customer services, atol sa usa ka online nga panagtigom sa
mga executives sa Visayan Electric ug pipila ka mga sakop sa news media sa Martes, Septiyembre 21, 2021.
Ang Load-e adunay mininum load nga P200 nga adunay 20 kilowatt-hours nga magamit sulod sa tulo ngadto sa lima ka adlaw, depende sa gamit sa kuryente.
Apan dili available ang Load-e sa tanang kunsomidor sa Visayan Electric.
Adto una ni itanyag sa mga kunsomidor nila nga anaa nahimutang sa Banilad, Kasambagan ug Lahug, mga barangay nga anaa sa Cebu City sugod sa Oktubre 15, 2021.
Sa dinhing mga dapita nahimutang ang daghang condominium ug commercial buildings, o space rental businesses o kanang magpaabang lang og gamay nga espasyo sulod sa usa ka building.
"Dili na ka makuyawan maputlan og kuryente kay wa ka makabayad o makuyawan nga makakita sa imong bill," matod ni Bonbon.
Matag karon ug unya, pahibaw-on sa Visayan Electric ang kunsomidor pila nalang ang nabilin sa iyang Load-e. Pinaagi niini, ma-budget sa kunsomidor ang iyang paggamit sa kuryente o angay na ba siya mag-load.
Ang load mapalit pinaagi sa Unionbank mobile app. (MPS)