SA katapusan gi-aprobahan na sa konseho sa dakbayan sa Lapu-Lapu ang Supplement Budget No. 3 (SB No.3) nga gipangayo sa executive department nga ipuno sa nahurot pundo gumikan sa Covid related expenses.
Ang SB No. 3 adunay kinatibuk-ang P81 milyones diin ang dakong pahat niini gitagana alang sa kampanya batok sa Covid-19 apan mokabat lang sa P58.5M ang gi-aprobahan.
Ang P45 milyones nga alang sa Covid response nga lakip sa P81 milyones nga budget ang gilaslasan ug P22.5 milyones ra ang gi-aprobahan.
Ang P15 milyones nga burial assistance nga gipaabot sa City Social Welfare and Development ang aprobado na sab.
Gipasabot ni Konsehal Flaviano Hiyas, chairman sa Committee on Finance nga katunga lang ang ilang giaprobahan sa gipangayong gahin sa kagamhanan alang sa Covid response kay wala ma-liquidate og tarong sa Accounting Office ang na-unang gigahin alang sa Covid sama sa pagpakita og mga voucher sa ilang nagasto.
“Ang ila man gud gihatag nga liquidation nga mura ra gani’g summary like mga lista nga mao ni gigamitan. Gusto unta nako kwestiyunon ug asa na ang mga recipient ani gamay ra kaayo ila gi-submit nga pila gud to almost P100 Million baya to,” matod ni Hiyas. (GCM)