MGA asawa ug kabanay sa mga construction worker nag-abot abot sa nagpadayon nga gitukod nga hotel resort sa South Reclamation Project, Dakbayan sa Sugbo kagahapon, Septiyembre 21.
Ilang nabalitaan nga nahugno ang gitukod nga building sa Universal Hotel Resort Inc.
Tungod sa tumang kabalaka midagsa ang gibana-bana 25 ka mga asawa aduna pay mga anak ang nangabot sa area aron pagsusi sa maong taho.
Gumikan sa kabalaka ngadto sa ilang sakop sa pamilya nga nanarbaho sa maong construction site.
Ilabi na nga wa gilayon mohatag og katin-awan ang management sa tinuoray nga hitabo hinungdan nga naabtan sila sa hapon og pinaabot og opisyal nga pahibawo.
Apan nasayran nga usa ka “gondola lift” nga maoy patungan sa mga trabahante kon adunay trabahuon sa ibabaw nga bahin ang nahagsa nga miresulta sa kamatayon sa duha ka workers.
NABUGTO
Ang kaubang construction worker niasoy nga pasado 9:00 kagahapon sa buntag sila nagtuo nga nahugno ang edipisyo nga ilang gitrabaho tungod sa ilang nadunggan nga saba nga dahunog dayon misunod ang kusog nga lagubo naggikan sa ibabaw.
Sa ilang pagsusi didto na sa basement ang mga biktima nga nakuyog sa pagkahagsa sa gondola naggikan sa 19th floor.
Ang namatay gi-ila nga si Junnel Tunda-an, 28, steelman, taga-Barangay Lahug, Dakbayan sa Sugbo kinsa dugay nakuha tungod kay nadat-ugan sa mga debris.
Samtang nadala pa sa ospital si Richard Dabasol Jr., 39, apan gideklarar nga dead on arrival sa Miller Hospital.
Nabantayan nga naputol ang cable wire nga maoy bitayan sa gondola lift.
OVERLOADED
Si Florante Catalan sa Office of the Building Official sa Cebu City Hall nga misusi sa area nga overloaded ang gondola.
Giingong gikargahan kini og bug-at nga construction materials.
“Kon tawo ra ang sakay ato, wala ra unta gikargahan og mga lain, bug-at na kaayo wala kadaog ang cable wire,” pagtino ni Catalan.
Gitataw sa OBO nga wa sila magkuwang sa pagpahigayon og inspection ngadto sa mga construction site sa dakbayan ug ilang gipaniguro nga luwas ang mga trabahante.
Nabantayan nila nga kulang sab sa mga signage, early warning devices ug ngitngit ang lugar.
GIPAHUNONG
Tungod sa aksidente niluwat ang OBO og cease and desist order (CDO) batok sa contractor sa hotel and casino.
Kini ang gibutyag ni City Councilor Dave Tumulak, chairman sa local disaster risk reduction and management council kinsa nibisita sab sa maong lugar.
Si Tumulak nagkanayon nga gisuspenso sa City Government pinaagi sa OBO ang pagtrabaho sa building samtang nagpadayon ang imbestigasyon sa kamatayon sa duha ka trabahante.
Ang contractor sa maong hotel ug casino gimanduan sa pagduso og incident report ngadto sa OBO kalabot sa maong aksidente.
Gipahibawo ni Tumulak nga adunay permit ang contractor sa pag-istalar sa gondola sa building, apan wala silay permit sa pag-operate sa gondola kansang dokumento lukaton gihapon didto sa OBO.
Misugyot sab si Tumulak ngadto sa safety engineers nga pabutangan og suga bisan adlawan gumikan sa kangitngit sud sa maong construction site.