MAAYONG adlaw na sab sa atong mga Super Suki. Kumusta naman mo diha sa inyong mga dapit?
Gamay na lang nga panahon ato na makita kinsa ang mga tinuod nga modagan sa umaabot nga Presidential Election sa 2022. Oktubre uno hangtud otso na ang filing sa Certificate of Candidacy sa mga kandidato.
Gani man, wala pay adlaw sa pag-file sa ilang mga kandidatura, ang mga gihugonhugon nga modagan nagpasiatab na sa ilang himuon kon sila na ang naa molingkod sa pagpadagan sa gobyerno sa nasud.
Apan motuo pa ba mo sa mga saad sa mga politiko? Tagsa-tagsa ka balay ang ihatag kuno ni Manny Pacquiao ngadto sa mga walay balay nga Pilipino!
Wow! Wala pay pangulo sa nasud nga nakabuhat niini nga ginasaad ni Pacquiao.
Iyang haw-ason sa kilisud ang katawhang Pinoy kay iyang nasinatian ang kahimtang sa usa ka kabus. Mokubit kaha ang katawhan ini nga estilo sa pagpangampanya kon ugaling maoy gamiton?
Hilabihang daghana baya sa wala pay kaugalingon nga balay ug mga kabus.
Gianunsiyo na ni Senador Panfilo Lacson ang ilang tandem ni Senate President Tito Sotto alang sa pagbag-o sa atong sistema sa gobyerno ug alternatibo nga pilion sa umaabot nga eleksiyon.
Apan sa reaksiyon sa katawhan daw dili pa nila madawat ang pag-uban sa duha ka mga beterano sa politika kay kon imong minugbuon ang ilang bansagon aron daling mahinumdoman sa katawhan mas mahimong pangalan nga ayran o isalikway gyud sa katawhan ang tandem nga Lac-Sot!
Gibungot na lang sa natad sa politika apan walay mga kongkreto nga legasiya nga ilang gipabarog aron sila magpabilin nga handumon sa katawhan.
Si Lacson, kahinumdoman nga nakabalik lang sa atong nasud human gitabangan ni kanhing Pangulo Benigno "Noynoy" Aquino gikan sa pagtago-tago sa Estados unidos tungod sa kaso nga gipasaka kaniya diin siya gitudlo nga utok sa Dacer-Corbito murder case.
Sa kahimtang sa administrasyon, wala pay gideklara kinsa gyud ang mamahimong suportahan nga kandidato kay tataw man ang pagbalibad ni Senador Christopher Lawrence Go nga dili siya modagan pagka- presidente ug wala pud siya nangandoy niana nga posisyon hinungdan sa iyang pagbalibad.
Nagkadaghan sab ang mga politiko nga nagkahiusa aron ilang ipakita ang suporta ug pag-aghat kang Mayor Sara Duterte-Carpio nga modagan samtang nakaduol ang filing sa ilang kandidatura.
Hayag nga kadaugan ug posible nga North ug South gihapon nga puwersa ang maghiusa alang sa kadaugan sa umaabot nga eleksiyon.
Kumusta sab ang pundok sa oposisyon?
Wala pa sab makahimo og tataw nga desisyon ang Liberal Party o Dilawan kay daw mas sayon alang kang Leni Robredo ang pagdaug ugaling sa lokal nga lebel sa Camarines ang iyang daganan kaysa magpapili siya pagka-presidente nga mora'g nisalom siya sa alkitran.
Mas labaw nga naunlod ug posibleng kalimtan na lang si kanhi Senador Antonio Trillanes tungod bisan ang iyang kanhi mga kauban dili na man ganahan.
Hinumdomi nga ang "Ituloy ang Pagbabago" dili kini slogan ni Mayor Sara apan nagsukad sa mga suporter nga nag-awhag kaniya sa pagdagan. Wa pa tay init nga balita gikan sa kampo ni Yormi sa pagsuwat ning opinyon, gawas nga nag-positive siya sa virus, atong iampo ang iyang kaayohan.