NAGKAULI na unta sa maayong kabubut-on sila si Nonito Donaire Jr. ug Johnriel Casimero ug niini giplanohan na usab unta ang ilang gikahinaman ug makasaysayong All-Filpino unification bout.
Apan murag gisungog sa kahigayunan ug daw sa mabara na usab kini human nga ang World Boxing Council (WBC) mimando ngadto kang Donaire sa pagdepensa sa iyang titulo batok sa laing Filipino fighter nga si Reymart Gaballo.
Si Gaballo, 25, mao kasamtangang WBC interim bantamweight champion human kini midaog batok ni Emmanuel Rodriguez sa Puerto Rico sa niadtong, Disyembre 19, 2020.
Kon kasinatian ang hisgutan, dili ikalimod nga dako og bintaha ang 38 anyos nga si Donaire, kinsa naggunit og 41-6, 27KOs nga rekord.
Apan kon abilidad ang hisgutan, dili mabitin ang 25 anyos nga si Gaballo, kinsa adunay impresibong rekord nga 24-0, 20KOs.
Ang kamanduan sa WBC natukma sa adlaw nga nagkasabot na unta sila si Donaire ug Casimero nga magpinasayloay ug kalimtan na lang ang tanang nahitabong panagbikil tali kanilang duha nga maoy hinungdan nga wala mahinayon ang ilang away nga gikatakda unta niadtong Agusto 14, 2021.
Sa sayo pa, gisugdan na sab unta’g hikay ang away nila ni Donaire ug Casimero nga giplanuhang ipahigayon karong Disyembre 21, 2021.
Gipasabot sa kampo ni Casimero, padayon pa nilang gihan-ay ang away batok kang Donaire.
“Still working on it,” matod ni Manny Pacquiao (MP) Promotions chief Sean Gibbons human nigawas ang taho kabahin sa Donaire-Gaballo fight. (JBM)