Sugilanon: Ang tawo sa selpon

LAMBERTO G. CEBALLOS

Ilaya, Cawayan, Dalaguete, Cebu


WALA mahikatulog dayon si Anellene nianang gabhiona.

Gisudlan ang iyang utok sa mga hunahuna unsaon pagsulbad ang iyang problema pinansiyal. Final exam na nila sunod semana sa usa ka unibersidad dinhi sa siyudad sa Sugbo diin siya magtungha sa silid sa Accountancy. Kinahanglan karong semanaha kabayran na niya ang balance sa iyang tuwisyon aron mahatagan siyag permit sa katapusang pasulit ning semestreha. Naproblema siya kay wa pa moabot ang kuwarta gikan sa iyang ginikanan nga atua sa Dauis, Bohol. Ang iyang mama Elena usa ka ordinaryong kawani sa munisipyo sa ilang lungsod, ug ang iyang papa David usa ka mag-uuma sa kaugalingong basakan.

Sumala sa teks sa iyang mama, sunod buwan pa anihon ang humay ug di pa sila makapadala og salapi kaniya. Misugyot si mama niya nga pahimuon siyag ‘promissory note’ para sa unibersidad aron siya makaapil sa eksamin. Dili siya buot mohimo niini kay sukad sa unang tuig niya sa kolehiyo hangtod karon nga gradweting na siya, wa siya makasuway og himog promissory note. Unya nahinumdom siya kang Merrisa, iyang paisana nga taga Tagbilaran, Iyang gitawgan sa selpon ug gisultian sa iyang problema

“Naa koy kaila nga negusyante nga makatabang nimo. Makapahuwam siya nimog salapi kon mosugot ka sa iyang imbitasyon,” matod ni Merrisa.

Naghunahuna sa makadiyot si Anellene. Miyango-yango siya ug mitubag, “Okey, Merr!”

Nianang pagka buntag samtang namahaw si Anellene dungan sa ubang kasera sa lodging house nga iyang gipuy-an mitunog ang iyang selpon. Inward call sa Skype.

“Hello!” matod niya.

“Miss Anellene Lumayno, you’re beautiful!” tingog sa tawo nga nakita ni Anellene sa screen sa iyang selpon. Edaran na kini apan guwapuhon. “Ako si Apollo Robles. Pwede ka ma-imbitar og panihapon?”

Misantop sa hunahuna ni Anellene nga napadala na ni Merrisa ang iyang litrato ug numero sa selpon ngadto sa tawo. Mitubag siya, “Yes, asa man, Sir?”

“Diri sa akong balay sa Punta Princesa, duol sa eskuylahan,” sa tawo nga mihatag pag ubang pahimangno aron matultulan dayon ang balay niini. “Is it a date?”

“Yes, Sir. I’ll be there,” ni Anellene.Misantop man sa iyang hunahuna ang umaabot nga hitabo. Daghan nang mga estorya nga iyang nadunggan kabahin sa mga estudyanteng babaye sa kolehiyo nga way kapaingnan kon di pa moabot ang ilang alawans gikan sa mga ginikanan sa probinsiya. Si Merrisa mismo mitug-an kaniya nga nakasuway na niini. Sudlan niya kini karon aron makamtan ang siyete mil pesos nga bayranan niya sa twisyon.

Nianang sayong hapon human sa iyang klase sa alas siyete, misakay dayon si Anellene og dyip paingon sa Punta Princesa. Dali da niyang nakit-an ang balay sa tawo nga nag-imbitar kaniya. Gipislit niya ang buzzer. May miduol nga babaye.

“Unsay ato, Ma’am?” sa babaye.

“Naa si Sir Apollo?” ni Anellene.

“Oo, naa.” Giablihan sa babaye ang geyt aron makasulod si Anellene.

Didto sa sala nag-ila-ila sila si Anellene ug Apollo. Gisaysay ni Anellene nga taga Dauis siya ug anak nila ni Elena Lloren ug David Lumayno.

“Pilay imong edad karon, Inday?” ni Apollo nga hugot nga mitutok kang Anellene nunot ang pagpahiyom.

“Twenty-two, Sir.”

Giasoy pod ni Apollo nga mga bayenti-tres ka tuig na ang nakalabay nahiadto siya sa Dauis isip sales supervisor sa kompaniya sa mga canned goods. May nakaila siyang maanyag nga dalaga nga nagtrabaho sa munisipyo. Nagkasuod sila ug nagkahigugmaay. Ug usa ka higayon gipakuyog niya ang dalaga sa Tagbilaran sakay sa iyang delivery panel aron palitan og sapatos ug sinina. Naabtan silag gabii didto sa Tagbilaran maong mi-check in sila sa usa ka lodging house aron pagpalabay sa kagabhion. Ug nianang gabhiona natagamtaman nila ang katam-is sa ilang gugma ibabaw sa kama.

“Unsay ngan sa imong uyab, Sir, basin nakaila ko?” ni Anellene nga gipangulbaan. Ginayanaya niya ang iyang kaugalingon aron dili dag-on sa kahadlok sa mahitabo kaniya.

Wala motubag si Apollo. Mitindog siya ug miduol sa bookshelf. Gibira niya ang hunos sa bookshelf ug gipagawas ang usa ka gamay nga picture frame. Iya kining gitunol sa iyang bisita.

Gidawat ni Anellene ang gamayng kwadro ug misiga ang iyang mga mata sa kahikurat. Litrato ni mama niya niya Elena ang diha sa kuwadro.

“S-Sir, si Mama Elena ni sa dalaga pa. Kaila diay mo, Sir?”

“Siya ang akong hinigugma didto sa Dauis. Ug naseguro nako human sa kwentada nako sa katuigan, ikaw ang bunga sa among pagminahalay, Inday.”

“Pero si Papa David Lumayno ang akong amahan, Sir.”

“Okey lang kay siya man ang namat-an mong amahan. Nalipay lang ko nga nailhan ko ikaw. May tukmang higayon sa umaabot nga sultihan mo si mama mo nga gikahibalag mo ang tinuod nimong amahan.”

“Gikalipay ko kining hitaboa, Sir!”“Drop the Sir. Daddy ang itawag mo nako.”

“Okey, Daddy,” ug gigakos ni Anellene si Apollo.

“Ugma, Inday, dad-a ang imong mga butang dinhi. Anhi na ka puyo basta nia ka sa Sugbo.”

“Basin masuko imong asawa ug mga anak, Dad.” “Wa man koy asawa ug mga anak. Wa man ko maminyo.”(KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph