GIPATAWAG sa Games and Amusement Board (GAB) ang atensiyon ni Daniel De Guzman, player sa San Miguel 3x3 team human nga nalakip kini sa video nga nag-viral sa Facebook diin gidudahan nga adunay nahitabong sugal ug game fixing sa usa ka kalihukan.
Ang summon letter nga gipirmahan ni Dioscoro Bautista, hepe sa professional sports division sa GAB, nagmando ni De Guzman sa pagtambong sa usa ka Zoom video conference karong Septiyembre 24, 2021 sa alas 10:00 sa buntag aron mopasabot sa iyang habig kalabot sa maong hitabo.
Usa ka screenshots sa usa ka tawo nga dakog pildi sa sugal sa duwa tali sa San Miguel ug Barangay Ginebra sa PBA tungod sa sayop nga tip nga gikan kuno ni De Guzman.
Si De Guzman, ang napili sa Beermen sa ika-42 sa overall pick niadtong 2019 PBA Draft, hugtanon nga mihimakak sa pasangil pinaagi sa iyang agent nga si Danny Espiritu.
Si GAB chairman Baham Mitra mipahimangno nga dili magpanuko ang ilang buhatan sa pag-revoke sa lisensiya sa mga professional athletes kon kini mapatud-a nga nakamugna og kalapasan. (JBM)