GI-KNOCKOUT sa Covid-19 ang world title fight ni Clyde Azarcon batok ni Thembelani Okolo alang sa World Boxing Foundation (WBF) minimumweight title sa sa South Africa.
Gumikan sa pagkatap sa coronavirus sa maong nasod, ang promoter, sa ikatulong higayon, mikanselar na usab sa maong away nga gikatakda unta karong Oktubre 3, 2021.
Si Christopher “Pingping” Tepora, ang trainer ni Azarcon, sa interview sa SunStar Cebu, mikompirmar ning maong kalambuan.
Orihinal unta nga mag-abot sila si Azarcon ug Okolo niadtong Hunyo 27, 2021 apan giuswag kini sa Augusto 30, 2021. Wa gihapon kini mahinayon gumikan sa susamang rason.
Sa kasamtangan, si Azarcon (17-3-1, 6KOs) maoy naghupot sa WBF Intercontinental minimumweight title human iyang napildi si Mike Kinaadman (7-13-2) niadtong Marso 9, 2020 sa Robinson’s Gallera, dakbayan sa Sugbo.
Sukad niadto wala na makasaka og balik pa ibabaw sa ring ang lumad nga taga Davao City.
Anaa karon siya sa ika-14 nga puwesto sa International Boxing Federation (IBF) ranking diin si Rene Cuarto maoy kasamtangang kampiyon sa ilang division. (JBM)