Rex Romarate
Minglanilla, Cebu
ANG Pilipinas nag-atubang og dakong hulga sa West Philippine Sea (WPS) tungod sa agresibong pagpangangkon sa China sa mga dapit nga nasulod sa iyang nine-dash line bisan kon ang international tribunal nihukom niini nga way legal nga basehanan. Sa ato pa, way gahom ang China sa pagpatuman niini, apan gitukoran nila og mga isla ang dapit.
Daghan usab nga mga barko sa China, sa iyang Navy ug Coast Guard, ingon man maritime militia nga libre kaayong nagpatrolya sa kadagatan sa WPS. Ang Pinoy nga mga mananagat mao pay abugon sa kaugalingon nga exclusive economic zone (EEZ).
Aron unta mapanalipdan ang interest niini sa iyang EEZ, ang Pilipinas nagkinahanglan og lig-on nga Navy pinaagi sa modernisasyon.
Mopalit na unta og laing duha ka mga corvette ang Pilipinas, apan wa nay madawdaw sa pundo kay gibalhin ngadto sa Covid-19 response fund.
Di lang Navy ang nasakripisyo, apil na ang Philippine Air Force (PAF) kay ang igpapalit og mga jet fighter, gitipas gihapon ang pundo ngadto sa panudlanan alang sa coronavirus disease 2019 (Covid-19).
Maayo ra ba kaayong nangangkon ang administrasyong Duterte sa mga abyon ug barko nga nangabot sa nasod bisan kon ang kanhi administrasyong Aquino pa ang niduso niini.
Binilyon kada tuig ang nawala sa Pilipinas tungod sa kakuwang sa mga barko nga maka monitor sa mga kalihukang illegal sa kadagatan sa WPS ug Spratlys nga naa sa sulod sa iyang EEZ.
Binilyon ka pesos nga magamit unta kaayo sa mga proyekto sa kagamhanan aron mopaluag sa kinabuhi sa kinabag-an.
Apan nausik kay inutil na man ang kagamhanan sa pagpatuman unta sa iyang balaud sa kaugalingon nga tugkaran. Ang makauuwaw kay mao pay hudlaton ug hulgaon nga unta ang gipanagatan kaugalingon man nga tugkaran.
Mas makahimangod kay ang kwarta toa gipamalit og mga galamiton batok sa Covid, apan mas mahal ug didto pa sa China gikompra nga maoy nag-isig isig sa mga Pinoy sa kadagatan sa Pilipinas. Kadako bayang insulto ani, di ba?