SUPERBALITA CEBU

Mama namatay pagluwas sa anak

PADUNG na mouli sa ilang balay si Stephanie Anco, 31, uban sa iyang 6-anyos nga anak nga lalake niadtong Sabado sa alas 9 sa gabii, Septiyembre 18, 2021, apan nadumbolan ang ilang gisakyan nga habalhabal sa usa ka trak sa pag-abot sa Brgy. Calajoan, Minglanilla.

Giseguro ni Stephanie nga di maigo ang iyang anak sa pagkalagpot, iya kining gihugot og gakos ug gilihay sa trak, apan ang katunga sa iyang lawas nalatayan sa sakyanan.

Ang bata ni-survive nga way tatsa, apan si Stephanie namatay sa Dominggo sa kaadlawon sulod sa Vicente Sotto Medical Center (VSMMC) tungod sa grabeng mga angol.

“Mao lage nga pagka-igo sa motorsiklo na-safety niya ang bata, wala siya magdahom nga mapasok sab diay iyang katunga sa lawas, nalatayan,” matod ni Police Major William Homoc, hepe sa Minglanilla Police Station.

Ang 31-anyos nga inahan nga nabiyuda sa 2020, nagbilin og 6 ug 11 anyos nga mga anak nga lalake.

Si Rogelio Manguilimotan Rentillosa, drayber sa trak, gibuhian sa Minglanilla police human magkasinabot ang tag-iya sa trak ug amahan ni Stephanie sa Lunes sa gabii, Septiyembre 20.

HINABANG

Si Homoc nga nahinabi sa Superbalita Cebu, nagkanayon nga ang duha ka mga bata naa nagpuyo uban sa ilang apohan nga lalake nga biyudo ug paralisado sa Upper, Pakigne, Minglanilla.

Ila kining giduaw sa Miyerkules sa buntag uban ang ilang Police Community Relations, Women and Children Protection Desk (WCPD) ug Department of Social Welfare and Services (DSWD) aron dad-an og mga gasa nga naglakip sa pagkaon, school supplies ug mga duwaan.

Si Homoc nibutyag nga nagtampo-tampo silang mga personnel sa Minglanilla Police aron dunay mahatag sa mga bata aron malipay.

Ingon sa gikumot ang iyang kasingkasing samtang nagtan-aw sa mga bata.

“Sama sa gikumot akong kasingkasing nga naglantaw sa mga bata, lipay kaayo sila! Ilang inahan naningkamot sab to nga mabuhi sila pero subo kay mitaliwag sayo,” dugang ni Homoc.

Ang amahan sa mga bata namatay sa miaging tuig sa sakit.

Human niini, bisan unsa na lang nga trabaho ang gisudlan ni Stephanie sama sa pagpanglabada ug pagpanglimpyo sa balay aron dunay ikabuhi sa mga anak.

Ang mga bata nga nakakita sa mga duwaan nalipay kaayo, ingon sa wa kaayoy kaamgo nga wa na diay ang ilang inahan nga mao unta mobuhi kanila.

Si Homoc nabalaka sa mga bata kay ang ilang apohan nga nabinlan sa mga bata paralisado usab.

Nangindahay sila nga dunay mga malumo og kasingkasing nga motabang sa apohan ug mga bata. /


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph